Prokuroria e Krimeve të Rënda ka deklaruar se është pranë identifikimit të mjetit me të cilin kanë udhëtuar të dyshuarit që realizuan shpërthimin në banesën e kryekomisar Alfred Nomanit, shef i Krimeve të Rënda në Policinë e Korçës.
Sipas një burimi të TCH, automjeti është tip “Benz”, me ngjyrë të bardhë, tip “190”, ndërkohë që janë duke u sekuestruar edhe kamera të tjera në kryeqytet për të saktësuar itinerarin e automjetit në të cilin shfaqen të dyshuarit.
Në kamera, thanë burimet, shfaqen tre persona ende të paidentifikuar, por vetëm njëri prej tyre zbret nga makina dhe kryen atentatin në banesën e shefit të policsë.
Kryekomisar Nomani është një oficer me gati 18 vite karrierë në radhet e Policisë së Shtetit. Ne dyshojmë, thanë burimet, se atentati i mbetur në tentativë është për shkak të detyrës së kryekomisarit, i cili e ka familjen në Kanada, ndërkohë që vet vazhdon punën në polici.
Shpërthimi raportohet se është realizuar me lëndë plasëse tritol dhe se ka ndodhur me anë të një fitili ndezës. Kryekomisar Nomani ka patur detyra të rëndësishme sikurse në policinë e Vlorës, të Shkodrës, Mirditës, shef komisariati në Tiranë dhe së fundmi në policinë e Korçës.
Top Channel
