Argjentinë, thellohet skandali i Presidentes, zhduket edhe ish-shefi i shërbimeve sekrete

Horacio Antonio Stiuso supozohej se do të dëshmonte gjatë së enjtes në lidhje me vdekjen misterioze të një prokurori special, i cili kishte ngritur akuza të ashpra ndaj Fernandezit. Autoritetet nuk kanë mundur ta gjejnë ish-drejtorin e Sekretariatit të Zbulimit, e jo më ta njoftonin atë se ishte thirrur për të dëshmuar.

Intriga që rrethon atë, prokurorin e vdekur dhe Presidenten aktuale të vendit daton qysh herët në vitin 1994, kur një makinë-bombë shkatërroi një qendër hebraike në Buenos Aires, duke lënë 85 viktima.

Prokurori special, Alberto Nisman, implikoi edhe Iranin në atë sulm, në raportin investigues prej afro 300-faqesh. Më pas ai akuzoi Fernandezin se kishte mbuluar përfshirjen e Teheranit, në mënyrë që të mundësonte një marrëveshje tregtare.

Argjentina e goditur rëndë financiarisht, sipas akuzës, do të mund të merrte naftën iraniane në këmbim të furnizimit me mish dhe grurë. Vetëm pak pasi dorëzoi raportin e tij dhe një ditë përpara se ai të dëshmonte përpara ligjvënësve në lidhje me akuzat e tij të lëshuara në janar, Nisman u gjet i vdekur në apartamentin e tij me një plagë plumbi në kokë.

Në koshin e plehrave të tij, hetuesit gjetën një urdhër-arresti në hartim e sipër për Fernandezin.

Presidentja reagoi shumë shpejt, duke e quajtur atë një vetëvrasje, e ndryshoi qëndrimin e saj vetëm pak ditë më vonë. Nga testimi mjekësor nuk u gjet asnjë mbetje baruti në duart e Nismanit, ashtu siç mund të pritej nëse do ta kishte tërhequr ai këmbëzën e armës.

Qeveria e Fernandezit akuzoi agjencinë e zbulimit për vdekjen e tij, madje Presidentja dorëzoi një projektligj për shpërbërjen e agjencisë aktuale dhe për zëvendësimin e saj me një Agjenci të re Federale të Inteligjencës.

Senati nisi debatet për këtë projektligj të mërkurën, ndërsa mbështetësit shpresonin ta kishin atë në tryezën e Fernandezit për nënshkrim më 25 shkurt. Ajo në fakt e drejtoi gishtin tek ish-kreu i shërbimeve sekrete, Stiuso, duke e akuzuar atë se i kishte dhënë informacione të rreme Nismanit dhe se kishte dorë gisht në vdekjen e tij. Sipas pretendimeve të saj, Stiuso kërkonte të përdorte Nismanin për ta diskredituar Presidenten, pas shkarkimit të tij vitin e kaluar.

Por, zëvendësuesi i Stiusos, Oscar Parrilli, vendosi ta thirrte sërish atë, jo si agjent por si dëshmitar. Të enjten, drejtori i ri tha se Fernandezi do ta çlironte Stiuson nga premtimi i tij për të ruajtur sekretet.

“Presidentja e kombit na ka dhënë direktivat e nevojshme, ndërsa ne po punojmë për përgatitjen e autorizimit për të çliruar Stiuson nga detyrimi për të mbajtur sekrete”, tha Parrilli. Edhe pse nuk lejohej të dëshmonte, ai sërish nuk mund të gjendet.

Top Channel