Bajerni e nis si mos më keq fazën e dytë

Në “Volkswagen Arena” bavarezët pësuan gol që në 4 minutat e para, ku për vendasit shënoi Dost. Pavarësisht përpjekjeve në 45 minutat e para për të gjetur golin e barazimit, të besuarit e Guardiolës nuk mundën të shënonin, madje në minutën e fundit të pjesës së parë ishte sërish Dost që dyfishoi shifrat me një gol të mrekullueshëm.

Në disavantazh të dy golave, Bajerni i Mynihut e nisi pjesën e dytë i hedhur i tëri përpara, por kundërsulmi i vendasve ishte ‘vrastar’ dhe vetëm 8 minuta pas nisjes së kësaj pjese ata arrijnë të shënojnë edhe golin e tretë, këtë herë me De Bruyne. Bernat, në të 55-ën ngushtoi diferencën, duke e çuar rezultatin në 3-1, por vetëm kaq, pasi bavarezët nuk mundën më të shkonin te goli, ndërsa vendasit shënuan edhe të katërtin, sërish me De Bruyne.

Me këtë fitore Volfsburgu shkoi në kuotën e 37 pikëve, duke shkurtuar diferencën në 8 pikë nga Bajerni kryesues.

Me interes janë edhe ndeshjet e ditës së shtunë, e sidomos sfida mes Bajer Leverkusen dhe Dortmund. Verdhezinjtë e drejtuar nga Klopp ndajnë vendin e fundit të renditjes me 15 pikë, aq sa edhe Freiburgu dhe janë në kërkim të dëshpëruar të pikëve, ndërsa “Aspirinat” kërkojnë fitoren për të ruajtur hapin që i mban në zonën që të çon në Ligën e Kampioneve.

Top Channel