Lezhë, bombë me celular furgonit

Drejtuesi i mjetit me targë “AA 994 GG” konstatoi në sediljen e pasme të automjetit një pako të mbështjellë me letër natribant, ngjyrë të zezë, si dhe një telefon celular të lidhur me të.

Ai njoftoi menjëherë policinë, duke dyshuar se kishte të bënte me lëndë eksplozive. Me të marrë njoftimin në vendngjarje shkuan forcat e policisë, duke marrë masat për sigurimin e zonës dhe vendosjen e perimetrit të sigurisë.

Menjëherë u ngrit një grup i posaçëm në përbërje të të cilit ishin ekspertë të policisë shkencore, specialistë të krimeve të rënda dhe ekspertë xhenierë.

Nga këta të fundit rreth orës 15.00 u bë çaktivizimi i lëndës së dyshuar plasëse. Ndërkohë, grupi hetimor vazhdon punën për dokumentimin e plotë ligjor dhe sqarimin e rrethanave të ngjarjes.

Korçë, digjet makina e arsimtarit

Policia: Zjarr i qëllimshëm. Shoqërohen 5 persona

Automjeti i drejtorit të Drejtorisë Arsimore në Korçë, Kristaq Grabocka është djegur në mënyrë të qëllimshme gjatë orëve të natës. Ngjarja është regjistruar teksa mjeti me targë “AA 050 CS” ka qenë i parkuar jashtë një lokali në lagjen numër 3 të qytetit.

Dyshohet se persona të paidentifikuar pasi kanë thyer xhamin e pasëm të mjetit kanë hedhur një shishe me lëndë djegëse e më tej i kanë vënë flakën.

Pas sinjalizimit të policisë për këtë ngjarje është ngritur pista kryesore e hetimit, ajo për shkak të detyrës, ndërkohë që në pakë orë blutë e Korçës kanë shoqëruar 5 persona dhe po punojnë për zbardhjen e ngjarjes.

Ngjarja duket se ka qenë e paralajmeruar, pasi pak ditë më parë po i njëjti mjet u gjet i dëmtuar në pjesën e gomave të cilat dyshohet se ishin çarë me mjete të mprehta. Rasti u denoncua në polici por ende pa u zbardhur sulmi i parë ai u pasua nga një tjetër më i rëndë.

Top Channel