Vrasja e hetuesit, Kirchner: Komplot kundër qeverisë

Përmes një letre ku shpreh bindjen se prokurori nuk është vetëvrarë, Kirchner vë në dyshim rindërtimin e ngjarjes të bërë në orët e fundit nga hetuesit mbi vdekjen e 51-vjeçarit Nisman.

“Vetëvrasja, jam e bindur, nuk është e tillë. Por bëhet fjalë për një operacion kundër qeverisë. Nuk kam prova, por dyshime. Nisman është përdorur sa ishte i gjallë dhe më pas duhej më shumë i vdekur”, thotë presidentja në letrën e saj të publikuar në Twitter.

Prokurori 51-vjeçar, që u gjet i vdekur të dielën e kaluar në apartamentin e tij, po hetonte mbi atentatin e vitit 1994 në qendrën hebraike të Buenos Airesit, që shkaktoi 85 të vdekur.

Letra e presidentes përgënjeshtron kështu versionin e parë të qeverisë, sipas të cilit bëhej fjalë për një vetëvrasje. Pas publikimit të saj ka ardhur edhe reagimi i prokurores Viviane Fein, që po heton misterin e fundit.

“Kirchner është e lirë të mendojë çfarë të dojë. Mund të mendojë se ishte një vetëvrasje, pastaj të ndryshojë mendim dhe të thotë se ishte vrasje”, ka thënë prokurorja për mediat.

“Unë i përmbahem hetimit tim dhe asaj që do të arrij të zbuloj në bashkëpunim me hetuesen që po më ndihmon”, ka shtuar Fein.

Në letrën e publikuar sot, Kirchner vlerëson gjithashtu se Nismanit i ishin dhënë “informacione false” dhe se agjentët sekretë që ai citonte në raportin e tij ishin agjentë të rremë që kishin vepruar me qëllim depistimin e ngjarjes.

Fein deklaroi të hënën se, në gjykimin e saj nuk ka pasur ndërhyrje të jashtme në vdekjen e prokurorit dhe se ai është vetëvrarë duke qëlluar veten në kokë me pistoletën e gjetur pranë kufomës së tij.

Top Channel