Beograd, samiti lë të kënaqur të gjithë

17/12/2014 00:00

Gjithçka ka përfunduar në Beograd, me autoritetet kineze dhe ato ballkanase që duket se kanë mbetur mëse të kënaqura nga ecuria e samitit dyditor Kinë-Evropa jug-lindore.

Në prag të largimit kryeministri kinez, Li Keqiang deklaroi se do të ngrihen grupe pune që do të merren me konkretizimin e projekteve për të cilat ka rënë dakord me homologët ballkanas.

Li tha se janë firmosur shumë marrëveshje dhe e konsideroi samitin shumë të suksesshëm. Sipas tij, projektet kanë qenë të hartuar nga ekspertët dhe do të realizohen nga vetë Kina dhe vendet e Ballkanit.

Samiti u konsiderua i suksesshëm edhe nga kryeministrat e rajonit, që pasditen e së mërkurës diskutuan në pallatin Serbija për marrëdhëniet dypalëshe.

Mësohet se Kina është shprehur e gatshme të ofrojë kredi pa interes ose me interesa të ulëta për vendet e rajonit, në mënyrë që në to të ketë zhvillim ekonomik.

Kryeministri kinez paralajmëroi se do ta vizitojë sërish Ballkanin në muajt e ardhshëm, për të diskutuar pikërisht mbi ecurinë e projekteve të përbashkëta.

Top Channel