PD – Pak shpresë, shumë zhgënjim

Në këtë shfaqje ai i paraqiti publikut koordinatorët e rinj të PD-së, të cilët, sipas tij, janë një frymëzim për PD-në, një vlerë për demokracinë. Personalisht i njoh disa prej tyre dhe në përgjithësi, pajtohem me mendimin se ata, në pjesën më të madhe, janë vërtet të rinj të talentuar, profesionistë të zotë dhe djem e vajza të edukuara, të sjellshëm që nderojnë familjet e tyre dhe rrethin ku bëjnë pjesë.

Aktivizimi i të rinjve në politikë gjithmonë është një vlerë dhe duhet përshëndetur. Shoqëria shqiptare është tejlodhur nga pesha e rëndë e politikës së vjetër dhe e politikanëve pa asnjë vlerë. Të rinjtë duhen inkurajuar dhe nxitur dhe në këtë pikë, unë jam në një mendje me Lulzim Bashën se ata vërtet janë një vlerë e shoqërisë sonë. Por vetëm kaq. Pra, kjo është drita e zbehtë e shpresës, pjesa tjetër është një zhgënjim i thellë.

Ata të rinj që u përfshinë në një strukturë të lartë të PD-së, e fituan atë betejë pa derdhur asnjë gram djersë. I vetmi kontribut i tyre është që janë djem dhe vajza të edukuar, të sjellshëm, që kanë një shkollim të mirë dhe vetëm kaq. Unë uroj që ata të shfaqin më pas edhe personalitetin e tyre politik dhe të tregojnë me vepra se cili është projekti i tyre. Pjesa më e madhe e opinionit publik është e zhgënjyer thellë nga PD-ja dhe nga mungesa e opozitës në vend.

Lulzim Basha është politikani me profilin më të ulët në krye të PD-së dhe karriera e tij politike nis pikërisht me këtë spektakël. Tetë vjet më parë, edhe Sali Berisha i paraqiti opinionit publik të rinj e profesionistë të talentuar dhe deklaroi se tashmë PD-ja po hapte një faqe të re. Në atë strukturë bënte pjesë edhe Lulzim Basha, i cili nga KOP-i fluturoi në strukturat më të larta të qeverisjes së PD-së dhe u bë për fat të keq modeli më i shëmtuar. Karriera e tij politike në këta tetë vjet është e mbushur me skandale dhe me krime. I akuzuar për shpërdorimin e 220 milionë eurove në tenderin e ndërtimit të Rrugës së Kombit kur ishte ministër, ai shpëtoi nga ndjekja penale me procedurë, por dosja është aty dhe peshon rëndë. Më 21 janar, kur ishte ministër i Brendshëm ai urdhëroi Gardën e Republikës të hapte zjarr mbi demonstruesit e pambrojtur dhe në atë masakër mbetën të vrarë 4 protestues. Pas kësaj ai u fut në garën për kryetar bashkie dhe u zgjodh në krye të Bashkisë së Tiranës me një proces të manipuluar. Të gjithë e kujtojnë se si u manipulua ai proces që u fitua nga Rama me 10 vota, por që u kthye mbrapsht nga Berisha dhe KQZ-ja e Ristanit. Kjo pra është karriera e njeriut që shndriste si yll në KOP-in e Berishës. Kjo është pjesa e zhgënjimit. Unë kam respekt për pjesën më të madhe të atyre të rinjve që janë përfshirë në strukturat e PD-së, por dyshoj se virgjëria e tyre politike dhe pastërtia e tyre morale nuk mund të mbulojë një traditë thellësisht negative të PD-së, e cila u përzu nga pushteti me votë plebishitare. Por këtu nuk mbaron e keqja, madje këtu fillon. Të ardhurit e rinj në PD duhet të sqarojnë pozicionin e tyre politik dhe duhet të shpallin në publik se cilën PD mbështesin. Prej 23 qershorit, qoftë edhe në mënyrë të mekur, janë krijuar dy rryma që e shohin humbjen fatale dhe krizën ku është futur PD-ja në mënyra të ndryshme. Njëra palë, ajo më e moderuara, kërkon që humbja e thellë e PD-së të analizohet me përgjegjësi dhe të evidentohen shkaqet, që Berisha dhe familjarët e tij të rrinë larg PD-së, që PD-ja të mos jetë më një pronë e familjes Berisha dhe që pushteti i Lulzim Bashës të mos jetë një prikë e familjes së ish-kryeministrit. Ata që njihen edhe si simpatizantë të të ndjerit Olldashi kërkojnë që PD-ja të ripërtërijë vlerat më të mira dhe pas analizës së thellë të humbjes të hartojë një strategji të qartë, që të bindë shqiptarët se ka ndryshuar. Grupi tjetër është ai i Lulzim Bashës dhe i Berishës. Ky grup kurrë nuk e ka pranuar humbjen dhe ka nisur projektin e shkatërrimit të opozitës. Bojkoti pa asnjë motiv, fjalori i vjetër, mungesa e një platforme të qartë dhe sherri parlamentar që vinte si pasojë e zemërimit të Berishës pse e kanë flakur nga pushteti, e katandisën opozitën e sotme në një mjerim të thellë.

Të rinjtë që Basha paraqiti të premten në sallën e SHQUP-it të ngjyer me blu duhet t’i tregojnë opinionit se cilën PD përfaqësojnë, PD-në që vajton për humbjen e Berishës apo PD-në që vuan thellë për humbjen e shkaktuar nga Berisha. Por para se të zgjidhin këtë dilemë, ata duhet të na thonë se cilin njohin si kryetar të PD-së, Lulzim Bashën apo Berishën. Apo të dy bashkë? Mund të ketë edhe interpretime të tjera të atij spektakli që dha Lulzim Basha të premten, por unë nuk u besoj zërave kritikë dhe cinikë njëkohësisht që vijnë si nga brenda PD-së, ashtu edhe jashtë saj, se KOP-i i ri është mbushur me fëmijë të pushtetarëve të vjetër të PD-së. Jo unë besoj se një pjesë e mirë e tyre janë vërtet të rinj të edukuar, të sjellshëm dhe të mirë. A do të ndikojnë ata në PD apo do ta falin vlerën e tyre në një formacion politik që është në krizë, kjo duhet parë. Fillimi ka pak shpresë dhe shumë zhgënjim.

Top Channel