Motra e pengut britanik, apel xhihadistëve
14/10/2014 00:00
Mafia italiane lë mënjanë rivalitetet në kërkim të partneriteteve, ja çfarë thotë raporti i DIA-s 27/05 22:52
Motra e pengut britanik, John Cantlie, i cili mbahet i burgosur nga militantët e ISIS, i ka bërë apel xhihadistëve për të dialoguar me familjarët e gazetarit.
Jessica Cantlie, tepër e shqetësuar, lutet për krijimin e kontakteve. Reagimi i saj ka ardhur pas publikimit të një video ku shfaqej 43-vjeçari, duke thënë se është në pritje të ekzekutimit.
Në deklaratën e saj Jessica ka thënë: “Jam motra e John. Po flas në emër të babait, i cili është i paaftë pasi vuan nga një sëmundje e rëndë. Nuk është e vërtetë që ne nuk kemi pasur kontaktuar me John, por lidhjet u ndërprenë për arsye tuajat. Ju përgjërohem që të rinisim bisedimet në kanalin që ka qenë i hapur më parë”, ka thënë Jessica.
Gazetari britanik, John Cantlie është përdorur nga militantët e ISIS për propagandë në një seri videosh kritike të Perëndimit.
Ndërkohë, 12 trajnues të ushtrisë britanike kanë mbërritur në Erbil të Irakut për të ndihmuar luftëtarët kurdë në operacionet e ndërmarra ndaj ISIS.
John Cantlie është kapur rob edhe dy herë të tjera më parë në Siri. Ai u rrëmbye në korrik të vitit 2012, ku qëndroi me duar e sy të lidhur për një javë derisa u shpëtua nga Ushtria e Lirë siriane. Gjithashtu ai u rrëmbye edhe në fund të vitit 2012, sapo ishte kthyer në Siri.
Top Channel
