Kinë, dënim me vdekje anëtarëve të sektit

Dy prej anëtarëve iu dha dënimi me vdekje, njërit burgim i përjetshëm dhe dy të tjerëve nga 10 vjet burg.

Sipas mediave kineze, viktima u vra pasi refuzoi t’u jepte numrin e saj të telefonit anëtarëve të sektit, të cilët kërkonin ta rekrutonin atë në radhët e tij.

Sekti i krishterë Zoti i Plotfuqishëm është i ndaluar në Kinë, por megjithatë ai pretendon se ka miliona anëtarë në radhët e tij.

Dënimi me vdekje për dy anëtarët, atë e bijë, u dha këtë të shtunë nga Gjykata e Popullit të provincës Shandong, bashkë me dënimet përkatëse për anëtarët e tjerë.

Gjithësesi, Gjykata Supreme e Kinës rishikon të gjitha dënimet me vdekje të dhëna nga gjykata e shkallëve të ulëta dhe ka të drejtë t’i rrëzojë ato.

Vrasja e gruas 37-vjeçare në muajin maj shkaktoi irritim në mbarë Kinën. Anëtarët e sektit hynë në një restorant të vogël McDonald’s, duke u kërkuar numrat e telefonit të pranishëmve, në përpjekje për t’i rekrutuar.

Gruaja, që ndodhej atje me të birin 7-vjeçar, refuzoi ta bënte këtë dhe anëtarët e sektit e rrahën për vdekje. Dhe kur ajo ulërinte nga dhimbja, agresorët u bënin thirrje klientëve të tjerë që të mos shikonin, ndryshe do të kishin pasur të njëjtin fat.

I intervistuar më vonë në burg, agresori kryesor nuk tregoi asnjë shenjë pendese. “E rraha me të gjithë forcën time. Ajo ishte dialli, ne duhet ta shkatërronim”, tha ai.

Top Channel