Ukraina kërkon NATO-n, Aleanca akuzon Rusinë

Sekretari i Përgjithshëm i Aleancës, Anders Fogh Rasmussen tha se pavarësisht mohimeve të Moskës është tejet e qartë se trupa dhe automjete ushtarake ruse kanë kaluar ilegalisht kufirin me Ukrainën.

Kryeministri ukrainas, Arseny Yatsenyuk deklaroi më herët se vendi planifikon t’i bashkohet NATO-s.  Ai tha se qeveria do t’i dërgojë një propozim parlamentit ku të anulohet statusi i neutralitetit për t’i hapur rrugë anëtarësimit në Aleancë. Lidhur me këtë, Rasmussen tha se Aleanca do të respektojë çdo vendim të Ukrainës për sigurinë e vet.

Nga ana tjetër, presidenti rus Vladimir Putin fajësoi qeverinë ukrainase për krizën dhe krahasoi rrethimin e dy qyteteve, Donetsk dhe Luhansk nga ushtria qeveritare me rrethimin e Leningradit nga trupat naziste gjatë Luftës së Dytë Botërore.

“Është e domodoshme që të detyrohen autoritetet ukrainase të nisin bisedime serioze (me rebelët)”, deklaroi Putin.

Kombet e Bashkuara kanë ndalur në 2600 numrin e personave të vrarë që nga nisja e konfliktit të armatosur në muajin prill, kur aneksimi i Krimesë nga Rusia u dha kurajo rebelëve në Donetsk dhe Luhansk të rrëmbenin armët dhe të merrnin nën kontroll dy rajonet.

Së fundmi rebelët hapën një front të ri luftimesh, në jug-lindje të vendit duke marrë në kontroll qytetin-port Novoazovsk. Orët e fundit raportohen luftime të ashpra pranë qytetit Mariopol, konsideruar si pikë strategjike për fatet e konfliktit.

Ushtria ukrainase ka përforcuar pozicionet e saj jashtë qytetit për ndaljen e ofensivës së rebelëve. Besohet se strategjia e ndjekur nga separatistët synon krijimin e një korridori tokësor mes zonave lindore ku vazhdojnë luftimet dhe Krimesë, totalisht nën kontrollin rus.

Top Channel