Shqipëria, perspektivë të qëndrueshme

Sipas gjigandit botëror të financave, ky konfirmim reflekton dy faktorë pozitivë pa të cilët Shqipëria do të kishte një vlerësim më të ulët të borxhit publik. I pari, i cili është njëkohësisht dhe ai me ndikimin më të madh, lidhet me konsolidimin fiskal që ka ndërmarrë qeveria e majtë në bashkëpunim të ngushtë me Fondin Monetar Ndërkombëtar.

Sipas Moody’s, këto masa sigurojnë një përgjigje fillestare domethënëse ndaj përkeqësimit të fortë të financave publike që u vu re në vitin 2013, veçanërisht në rënien e të ardhurave.

Ndërsa faktori i dytë, i cili ka ndikuar pozitivisht në besueshmërinë e borxhit të Shqipërisë është marrja e statusit kandidat në qershorin e kaluar.

Moody’s thotë se pret efekte pozitive nga marrja e statusit, veçanërisht tek investimet e huaja. B1 mbetet ende një vlerësim në shkallën e poshtme të cilësisë së borxhit, i cili refleketon dobësitë e ekonomisë shqiptare dhe institucionet e dobëta.

Por çfarë do ta përmirësonte këtë vlerësim? Sipas agjencisë ndërkombëtare, progresi në reformat strukturore do të ushtronte presion poztiv për ngritjen e vlerësimit, veçanërisht tek ai i forcimit të institucioneve, suksesi në luftën ndaj korrupsionit dhe efiçenca e sistemit gjyqësor. Këto reforma sipas Moody’s do të përmirësonin konkurruencën dhe klimën e biznesit.

Ndërsa nga ana tjetër faktorët që mund të çojnë në përkeqësimin e vlerësimit janë dështimi për të vënë nën kontroll borxhin dhe materializimi i detyrimeve të mëdha potenciale për qeverinë nga gjyqet e pronave dhe sektori i energjisë.

Vlerësimi për Shqipërinë është kryer në datën 7 gusht. Në seancë komiteti i vlerësimit ka arritur në përfundimin se fuqia institucionale e Shqipërisë është rritur, ndërsa ajo fiskale dhe financiare ka rënë.

Në fund, komiteti nënvizon se themelet e ekonomisë, duke përfshirë dhe fuqinë ekonomike të vendit, nuk kanë ndonjë ndryshim të rëndësishëm ashtu si dhe rreziku operacional.

Top Channel