Rajoni juglindor vit pas viti po orientohet drejt kultivimit të bimëve medicinale duke braktisur kulturat tradicionale.
Puna e lodhshme, por edhe mungesa e tregut për prodhimet vendase i ka bërë fermerët që të lënë mënjanë të lashtat apo edhe prodhimet e tjera dhe më me pak kosto dhe punë të kultivojnë bimë medicinale.
Krahasuar me një vit më parë, sipërfaqja e kultivuar është dhjetëfishuar, ndërsa sipas specialistëve, një prej faktorëve kryesorë që kanë ndikuar është tregu i sigurt për këtë prodhim.
Vullnet Gjolla, specialist i bujqësisë, shpjegon: “Fermerët e kanë tregun e garantuar dhe bimët medicinale japin një fitim të mirë.”
Këtë vit, në rajonin juglindor përllogariten rreth 203 ha të mbjella me bimë të ndryshme, ndërsa vitin e kaluar kjo sipërfaqe ka qenë vetëm 26 ha dhe thuajse e pallogaritshme.
Këto toka më parë rritnin perime, drithëra dhe kultura të tjera të cilat jo gjithmonë gjenin treg apo çmim të mirë shitjeje.
Top Channel
