Berisha, para Podestës ditën e fundit

15/05/2014 00:00

Një ditë para se të linte pushtetin, ish-qeveria e djathtë i pagoi kompanisë lobuese “Podesta” 180 mijë dollarë për shërbime lobimi. Lajmi zbulohet nga sajti “Influence Explorer”, pjesë e Sunlight Foundation, burimi qendror i të dhënave për paratë dhe influencën në politikën amerikane.

Sipas dokumenteve të publikuara, pagesa prej 180 mijë dollarësh nga ish-qeveria shqiptare është kryer në datën 9 Shtator të vitit të kaluar. Një ditë më vonë, presidenti Bujar Nishani dekretoi qeverinë e re të majtë, që doli fituese në zgjedhjet e Qershorit.

Pagesa prej 180 mijë dollarësh është vetëm njëri nga këstet, që ish-qeveria shqiptare ka paguar për lobim vitin e kaluar. Sipas “Influence Explorer”, në total për vitin 2013 shuma e paguar, nga muaji Prill deri në Shtator, ka qenë 560 mijë dollarë. Të gjitha janë përfituar nga grupi “Podesta”, kompania lobuese e Toni Podestës.

Pagesat e vitit të kaluar janë vazhdim i një historie, që ka nisur kohë më parë, në vitin 2007, kur u nënshkrua kontrata e parë e lobimit me kompaninë “Euro Ridge”, në pronësi të ish-sekretarit për Sigurinë e Brendshme në SHBA, Tom Ridge.

Që nga ajo kohë, kontratat për lobim dhe për kurimin e imazhit të qeverisë shqiptare në sallonet e politikës amerikane kanë vazhduar vit pas viti. Në 2009 del në skenë “Patton Boggs” dhe më vonë “Podesta”. Dy kompani që, sipas “Sunlight Foundation”, vetëm për periudhën 2011-2013 kanë marrë nga qeveria shqiptare rreth 2,4 milionë dollarë për shërbime lobimi.

Top Channel