Nigel Stepney, ish kryeinxhinieri mekanik i Ferrati ka gjetur vdekjen në një aksident të çuditshëm rrugor në Angli.
Stepney, 56 vjeç është përplasur në autostradën angleze M20 pak pasi ka dalë nga makina e tij. Ai ka ndaluar, (arsyet mbeten për t’u zbardhur se përse) ka hapur derën dhe ka dalë në rrugë, kur është goditur fuqishëm nga një tjetër mjet.
Aksidenti ka ndodhur në orët e para të së premtes dhe megjithë ndihmën mjekësore që mbërriti shpejt në vendin e ngjarjes, 56-vjeçari nuk u ka mbijetuar plagëve.
Lajmi është konfirmuar edhe nga JRM Racing, një skuadër e garave ekstreme me makina, ku Stepney mbante pozicionin e kryeinxhinierit që nga 2010, vit kur i përfundoi pezullimi i vendosur nga FIA.
Inxhinieri britanik ishte në qendër të skandalit të spiunazhit në vitin 2007, kur u akuzua dhe më pas u pushua nga Ferrari për dhënien e informacionit të rezervuar rivalëve të McLaren. Gjithcka u vërtetua kur në banesën e projektuesit të McLaren, Mike Coughlan u gjetën skica teknike të Ferrarit, të përdorura nga skuderi angleze në favorin e saj.
Në fund të skandalit, McLaren u gjobit me 100 milion dollarë dhe u skualifikua nga gara për titullin e konstruktorëve.
Nigel Stepney, Ross Braën dhe Rory Byrne ishin 3 emrat që kaluan nga Lotus tek Ferrari dhe protagonistë të sukseseve të Kokëkuqes me Cavallino-n dhe Schumacher.
Top Channel
