Në Mynih u zhvillua seanca e dytë e procesit gjyqësor ndaj bosit të Formula 1, Bernie Ecclestone, i cili akuzohet për korrupsion nga autoritetet gjermane.
Hetuesit gjermanë këmbëngulin se kanë prova që vërtetojnë se Ecclestone ka paguajtur 44 milion dollarë ish-drejtuesit të një banke, Gerhard Gribkowsky, për të ruajtur pushtetin e vet në Formula 1.
Në ditën e parë, avokatët e Ecclestone argumentuan pagesën duke e cilësuar atë si krejtësisht brenda kuadrit ligjor gjerman, ndërsa në ditën e dytë, hetuesit u mjaftuan me një deklaratë të shkurtër ku thonin se ishin vënë në dijeni të deklaratës së bosit të Formula 1.
Brenda 26 seancave të paracaktuara, hetuesit gjermanë duhet të provojnë që manjati britanik pagoi 44 milion dollarë Gribkowsky-t për të përfituar të drejtën televizive të F1, deri në atë kohë ekskluzivitet i bankës gjermane, “BayernLB”, ndërsa për Ecclestone ajo pagesë është bërë për të mos u denoncuar nga bankieri tek autoritetet britanike, ku do të rrezikonte të gjobitej miliona dollarë nga autoritetet fiskale atje.
Në seancën e dytë, Ecclestone shoqërohej nga bashkëshortja e tij shumë më e rë në moshë, 38-vjeçarja braziliane, Fabiana Flosi.
Më 9 maj, përpara gjykatësit Peter Noll do të dëshmojë ish-bankieri Gerhard Gribkowsky, dëshmitari kryesor i skandalit dhe i dënuar me 8 vite burgim nga i njëjti gjyqtar pas pranimit se kishte marrë shumën marramendëse të parave nga Ecclestone.
Top Channel
