Javët e fundit është përfshirë në një polemikë publike me trajnerin e Juventusit, Antonio Conte, por kjo nuk e pengoi teknikun e Romës që ‘të ulë armët dhe të pranojë se kampionati ka përfunduar’.
“Kampionati u mbyll dhe cilido qoftë rezultati i ndeshjes së nesërme në Katania nuk ka asnjë vlerë. Megjithatë ne do të udhëtojmë për të fituar, dhe si zakonisht të luajmë një futboll të bukur dhe të japim gjithcka në fushë””, deklaroi tekniku i Romës.
Të hënën Juventusit i mjafton të mos humbë për t’u shpallur kampion i Italisë.
“Urime atyre. Janë një skuadër me lojtarë të mëdhenj që kanë zhvilluar një kampionat rekordesh. Por është edhe meritë e jona që i shtymë të bënin këtë kampionat, ashtu sikundër është edhe meritë e tyre që na shtye neve të bëjmë këtë kampionat rekordesh”, thotë Garcia.
Trajneri i Romës foli për ‘lojtarë të mëdhenj dhe një klub të madh’, por asnjëherë ‘trajner i madh’. Mes tij dhe Conte javët e fundit janë shkëmbyer deklarata dhe kundërdeklarata të nxehta. Por trajneri francez këtë herë u ka thënë ‘stop’ polemikave.
Me vendin e siguruar në Ligën e Kampioneve, Garcia thotë se skuadra do të japë maksimumin për të nderuar Italinë, ndërsa shton se në ditët e ardhshme do të takohet me drejtuesit verdhekuq për të përcaktuar objektivat e merkatos për të qenë sa më kompetitivë si në arenën ndërkombëtare ashtu edhe në Serinë A.
Top Channel
