Mesfushori i Juventus, Paul Pogba ka kritikuar ish-punëdhënësit tek
klubi i Manchester United, duke i akuzuar ata se tregonin mungesë
respekti ndaj tij.
Prania e Pogba në Old Trafford nuk kaloi pa polemika, me gjigandët e Premier League që u përfshinë në një betejë ligjore në lidhje me shkëputjen e tij nga Le Havre në 2009.
Francezi e bëri paraqitjen e tij të parë në Premier në janar 2012, por u largua për tek Juventus menjëherë pasi nuk ra dakord për rinovimin e kontratës.
United deklaroi më vonë se Pogba donte të largohej, por tani 21-vjeçari thotë se drejtuesit e klubit anglez treguan mungesë respekti ndaj tij.
“Ata më lanë jashtë sepse thoshin se unë doja të largohesha. Kjo është mungesë respekti. Ndoshta nuk u shkoi në mendje se po bënin gabim”, ka thënë Pogba për BBC.
Trajneri i atëhershëm i United, Alex Ferguson kishte deklaruar se Pogba nuk e respektonte ekipin, por mesfushori i Juve sqaron se ishte i detyruar të stërvitje më vete nga grupi pasi kontrata e tij përfundoi.
“United është një klub i madh, por njeriu duhet të mendojë për veten. Unë duhet të luaja. Trajneri më thoshte se do të kishte hapësirë edhe për mua, por unë nuk futesha në lojë”, ka thënë Pogba.
Top Channel
