Jose Mourinho duket i destinuar ta mbyllë këtë sezon me shprehjen aq të urryer prej tij “zeru tituli”. Edhe pse gara per titullin e Premier League-s është ende e hapur, gjithsesi mbetet sërish e vështirë për Chelsea-n e drejtuar prej tij.
Tekniku portugez nuk e konsideron dramatike situatën. “Të arrinim deri këtu ku kemi mundur të arrjimë, ka qenë diçka shumë e mirë. Nuk ka qenë një sezon i dështuar, sepse kemi hedhur bazat për atë pasardhës. E pata thënë që në fillim, që do të ishte një sezon tranzicioni. Sa i përket merkatos, do të kërkoj vetëm dy lojtarë. Diego Costa është i Atletico Madrid”, është shprehur “Special One”.
“Krahasuar me vitin e kaluar jemi përmirësuar ndjeshëm. Sot nuk jam i lumtur, nëse do të më shihni ndonjëherë të lumtur 2 ditë pas një humbjeje, do të thotë që me siguri do ketë ardhur koha për t’u ndalur së trajnuari. Megjithatë kam treguar se kam aftësi të mëdha për të reaguar, ndaj dhe mendoj vetëm për 2 ndeshjet e radhës dhe për sezonin e ardhshëm. Duam ta mbyllim sa më mirë këtë aktualin, me ndërgjegjen se kemi dhënë gjithçka, edhe pse kemi shumë pak shanse për të fituar titullin kampion”.
Fakti që mund ta mbyllë sezonin duarbosh nuk e terrorizon, ndryshe nga sa është shprehur dikur, në krye të Interit, kur me shprehjen “zeru tituli” mundohej të sulmonte homologët rivalë.
“E kisha thënë se do të ishte një vit tranzicioni, do të shqetësohesha vetëm nëse këto rezultate do t’i kishim edhe në 2 vitet e ardhshme. Pasi të përfundoj punën do të marr 2 javë pushime dhe më pas do të rikthehem sërish. Në merkato do të ndërhyjmë për 2 lojtarë, por sa për Diego Costa-n mund të them se është sulmues i mirë, gjithsesi luan për Atletico-n”.
Në palmaresin e tij shfaqet për herë të parë shifra 0, pas 20 triumfeve të arritura në 12 vjet karrierë si trajner: 6 me Porton, 6 me Chelsea, 5 me Inter dhe 3 me Real Madrid. Sërish për t’u pasur zili, si trajneri më i suksesshëm i viteve 2000, por këtë herë me “zeru tituli” duket se armiqtë do të jenë gati për t’i rënë këmbanave, sidomos nga Italia.
Top Channel
