Grupimi G7, ku bëjnë pjesë 7 fuqitë ekonomike të botës, ka rënë dakord për të intensifikuar sanksionet ndaj Rusisë për shkak të veprimeve të saj në Ukrainë.
Në një deklaratë për shtyp të shpërndarë nga G7-a nuk jepeshin detaje mbi llojin e sanksioneve, por një zyrtar i Shteteve të Bashkuara deklaroi se ato mund të njoftohen të hënën.
Perëndimi e akuzon Rusinë se drejton njësitë separatiste në lindje të Ukrainës, pak muaj pasi aneksoi gadishullin e Krimesë, akuzë të cilën Moska e mohon.
Nërkohë, më herët Shtetet e Bashkuara deklaruan
se avionët ushtarakë të Rusisë kanë kaluar disa herë brenda 24 orëve në
hapësirat ajrore të Ukrainës.
Lajmi u bë i ditur nga një zëdhënës i Pentagonit, i cili tha për BBC se incidenti ka ndodhur kryesisht pranë kufirit me Rusinë, por nuk dha hollësi të mëtejshme.
Më parë, separatistët pro-rusë sekuestruan një autobus me përfaqësues ndërkombëtarë, që thuhet se i përkisnin Organizatës për Siguri dhe Bashkëpunim në Evropë, OSBE.
Sipas Ministrisë së Brendshme të Ukrainës, kanë nisur negociatat për lirimin e monitoruesve, ndalimi i të cilëve u bë në afërsi të qytetit të Sloviansk-ut.
Separatistët akuzojnë se vëzhguesit e OSBE-së në të vërtetë janë spiunë të NATO-s dhe për lirimin e tyre kërkojnë lirimin e shokëve të tyre të burgosur.
Deklarata u bë nga një prej liderëve separatistë të Donetskut, Denis Pushilin, përpara selisë së shërbimeve sekrete në qytetin e Slovianskut.
“Dje arrestuam disa spiunë të NATO-s. Këta njerëz nuk do të lirohen, ata do të shkëmbehen me të burgosurit tanë”, deklaroi shefi i separatistëve.
Çdo ditë e më shumë gjuha e diplomacisë po zëvendësohet nga konfrontimet
e akuzat reciproke, teksa Shtetet e Bashkuara dhe Rusia po bëjnë
manovrat e tyre, në mesin e krizës, mbi ardhmërinë e Ukrainës.
Për situatën delikate ndërhyri një ditë më parë edhe kancelarja gjermane Angela Merkel, që në një bisedë telefonike me presidentin rus Vladimir Putin shprehu shqetësimin e saj të thellë për situatën.
Lajmin e bëri të ditur zëdhënësi i saj, Steffen Seibert, sipas të cilit gjatë bisedës kancelarja theksoi se pret që Moska të zbatojë marrëveshjen e Gjenevës.
Nga ana e tij, lideri i Kremlinit u përgjigj duke dënuar ashpër tentativat, sipas tij, të regjimit të Kievit për të përdorur forcat e armatosura kundër qytetarëve paqësorë në jug-lindje të Ukrainës.
Top Channel
