Kosovë, protestë e punonjësve të KEDS-it

23/04/2014 00:00

Qindra punonjës të Korporatës së privatizuar Energjetike të Kosovës kanë protestuar para zyrave qendrore të KEDS-it, duke kërkuar ngritjen e pagave.

Nëse deri javën e ardhshme pagat nuk rriten, protestuesit kanë paralajmëruar se do të hyjnë në grevë. Për më shumë se një orë, protestuesit kanë mbajtur të bllokuar rrugën para KEDS-it, ku para tyre kanë folur përfaqësuesit e të gjitha distrikteve në Kosovë.

Kryetari i Federatës së Sindikatave të Pavarura Elektrokosova, Fehmi Pajaziti i ka bërë thirrje bordit menaxhmues të KEDS-it, por edhe komitetit ndërministror që e mbikëqyr këtë kompani të privatizuar, që të reflektojnë në kërkesat e punonjësve dhe t’i realizojnë ato.

Përveç ngritjes së pagave, protestuesit kanë kërkuar edhe nënshkrimin e marrëveshjes kolektive, pagesat e orëve të punuara jashtë orarit, si dhe përshkrimin e ri të vendeve të tyre të punës.

Kërkesat e punonjësve të KEDS-it për ngritjen e pagave kanë ardhur pas vendimit të qeverisë për ngritjen e pagave për gjithë sektorin publik, por jo edhe për ata të kompanive të privatizuara.

Top Channel