Botuesit shqiptarë nuk kanë shfaqur interes të madh për Panairin Ndërkombëtar të Librit në Shkup që u hap të martën. Në këtë panair, ku kanë ngritur stendat e tyre mbi 70 shtëpi botuese, numri i botuesve shqiptarë është simbolik.

“Në këtë panair marrin pjesë 5-6 shtëpi botuese shqiptare. Shtëpitë botuese nga Kosova nuk janë prezente, kështu ka qenë edhe vitet e tjera. Mendoj se është një gjë shqetësuese sepse ky panair në Shkup duhe të jetë qendër ku takohen të gjitha shtëpitë botuese shqiptare dhe frekuenca e tyre të jetë sa më e madhe”, ka deklaruar Nehat Avziu, përfaqësues i shtëpisë botuese “Albas”.

Botuesit nga Shqipëria, përveç ankesave për proçedurat doganore, kanë vërejtje edhe për trajtimin jo të mirë në panairin e Shkupit.

“Pengesa e parë është dogana, e dyta është blerësi, a ka interes botuesi ta sjellë librin këtu nëse nuk i shitet. Problemi tjetër është edhe trajtimi, stendat tona janë në periferi, kurse ato të botuesve maqedonas janë në qendër dhe me lloj-lloj zbukurimesh dhe më të privilegjuara”, është shprehur Apostol Duka nga shtëpia botuese “Labova”.

Për të shtuar prezencën e tyre në Panairin Ndërkombëtar të Librit në Shkup, përfaqësuesit e shtëpive botuese nga Shqipëria thonë se mund të ndihmojnë qeveritë e të dyja vendeve, duke bërë lehtësimin e proçedurave doganore për kalimin e librit në kufi.

Në këtë panair, që do të jetë i hapur deri më 14 prill, përveç shtëpive botuese nga vendi marrin pjesë edhe botues nga Bullgaria, Serbia, Hungaria, Italia dhe Suedia.

Top Channel