Ambasadori gjerman në Kosovë, Peter Blomeyer ka deklaruar se Kosova dhe
Bashkimi Evropian janë duke zhvilluar negociata për themelimin e
gjykatës për krimet e luftës.
Sipas tij, gatishmëria e Kosovës për të themeluar këtë gjykatë do të ishte një tregues i krenarisë se vendi nuk u frikësohet hetimeve për pretendimet në lidhje me krimet e luftës.
Në një intervistë për “RTK”, ambasadori Blomeyer ka thënë se Kuvendi i Kosovës duhet të votojë para shpërndarjes për zgjedhjet parlamentare për gjykatën dhe zgjatjen e mandatit të EULEX-it.
“BE dhe Kosova janë duke negociuar detajet për krijimin e kësaj gjykate dhe mendoj se janë shumë afër gjetjes së zgjidhjes. Është diskutuar nëse kjo gjykatë do ta njolloste ose jo reputacionin e Kosovës dhe të UÇK-së. Mendoj që pikërisht kundërshtimi i themelimit të gjykatës do ta damkoste reputacionin e UÇK-së dhe Kosovës, sepse njerëzit do të fillonin të thoshin: ‘Ata po fshehin diçka. Pse nuk duan ta kenë këtë gjykatë?’”, ka thënë Blomeyer.
Sipas tij, një Kosovë që ka vetëbesim do të pajtohej me themelimin e gjykatës, pasi kështu do të kontribuonte në justifikimin e Kosovës.
“Sa herë që ndodh një krim, ai duhet të hetohet dhe drejtësia duhet të veprojë. Prandaj besojmë që është e nevojshme të themelohet një gjykatë e re për krimet të cilat task forca është duke i hetuar dhe pastaj drejtësia do ta thotë fjalën e saj”, është shprehur ambasadori.
Top Channel
