PDSH, akuza ministrit të Ekonomisë

“Deputetët e BDI-së, që prej 10 vjetësh udhëheqin Ministrinë e Ekonomisë, asnjë investim nuk sollën në vendbanimet shqiptare. As edhe një vend pune nuk u hap për shqiptarët. Por përkundrazi, biznesi shqiptar u dëmtua skajshmërisht nga hajnia dhe zhvatja e njerëzve të BDI-së”, deklaroi Ibrahimi.

Ai tha se posedon disa dokumente që sipas tij, dëshmojnë se ministri i Ekonomisë, Valon Saraçini i ka kërkuar një sipërmarrësi shuma të mëdha parash për t’i ndarë një konçesion nga ministria të cilën e drejton.

“Në dorë kam dokumentet që dëshmojnë nivelin eklatant të korrupsionit në sektorin e ekonomisë që udhëhiqet nga kuadri i BDI-së, Valon Saraçini. Kjo dosje fakton se si një sipërmarrësi i kërkohen shuma të mëdha parash nëse dëshiron që kompania e tij të fitojë një nga konçesionet e shumta që ndahen nga Ministria e Ekonomisë”, shtoi Ibrahimi.

Sipas ish-deputetit të PDSH-së, kjo dosje i është dërguar edhe përfaqësive të huaja diplomatike në Shkup, policisë dhe Komisionit për Anti-korrupsion. Nga ana tjetër, në një reagim me shkrim, BDI këto akuza i ka quajtur të pabaza.

Sipas partisë së Ali Ahmetit, PDSH-ja e Menduh Thaçit, në pamundësi të ruajë kompaktësinë e vetë, po përpiqet që procesin e shpërbërjes së partisë ta mbulojë duke bërë akuza që s’i beson as vetë.

BDI më tej akuzon PDSH-në se ka devijuar plotësisht nga qëllimet kombëtare. Në reagimin e partisë shqiptare në pushtet thuhet se, “gjuha plot urrejtje e anëtarëve të PDSH-së është në shërbim të përçarjes shqiptare dhe ka për detyrë të mbulojë me akuza banale argatllëkun e saj të paskrupullt, që vetëm krerët e saj e saj e dinë sesi u shpërblehet”.

Top Channel