Izrael-Gaza, vijojnë sulmet

Grupi i militantëve islamikë palestinezë të Xhihadit, thanë më herët se kishin arritur një mirëkuptim për të rikthyer marrëveshjen e armëpushimit të 2012-s. Por, Izraeli nuk e ka konfirmuar këtë.

Një ditë më parë, sasia më e madhe e predhave janë hedhur kundrejt Izraelit, që prej konfliktit të vitit 2012. Forcat izraelite të Mbrojtjes (IDF) thanë se ishin rreth 60 raketa që goditën Izraelin gjatë së mërkurës.

Ndërkohë, 8 raketa të tjera ishin lëshuar drejt vendit hebre gjatë së enjtes, pas të cilave Izraeli sulmoi 7 “vende terroristësh” në Gaza. Nuk raportohen viktima mes izraelitëve.

Agjencia e lajmeve “Reuters” citoi dëshmitarë që kishin thënë se 3 palestinezë ishin plagosur, pa i identifikuar nëse ishin civilë apo militantë.

Lideri i Xhihadit Islamik në Gaza, Khaled al-Batch, njoftoi më herët se Egjipti kishte ndërmjetësuar paktin për rikthimin e armëpushimit të 2012-s, dhe se paqja do të rikthehet nëse izraelitët përmbushin kushtet.

“Pas kontakteve dhe përpjekjeve intensive egjiptiane, marrëveshja për qetësi është rikthyer në pajtim me kushtet e arritura në 2012-n në Kajro”, tha ai në Facebook.

Momente më parë, zëdhënësi ushtarak i Izraelit, Peter Lerner, tha se Izraeli do të “vazhdojë të eliminojë rreziqet, teksa ato njohin vetëm zhvillime”. Ai shtoi se “kjo është detyra jonë dhe përgjegjësia ndaj atyre që i ekspozohen terrorizmit nga Gaza”.

Izraeli ka ndërmarrë dhjetra sulme ajrore që prej së mërkurës, duke goditur bazat e qeverisë së Hamasit në Gaza, por edhe Bigadën al-Quds përreth territorit të tyre.

Xhihadi Islamik tha se kishte lëshuar raketa gjatë së mërkurës, në shenjë hakmarrje për vrasjen e 3 militantëve të tyre në një sulm ajror të Izraelit, një ditë më parë. Izraeli njoftoi se kishte sulmuar militantët, menjëherë pasi kishin lëshuar raketa murtajash ndaj ushtarëve izraelitë.

Top Channel