Michael Schumacher po tregon shenja përmirësimi. Lajmi i mirë është shpërndarë nëpërmjet një komunikate nga Sabine Kehm, zëdhënësja e ish-pilotit gjerman të Formulës 1.
“Jemi të bindur se Michael do të zgjohet. Ka ditë që jep sinjale të vogla përmirësimi që na inkurajojnë. Gjithmonë e kemi ditur që kjo është një luftë e gjatë dhe e vështirë. Po mundohemi t’i përcjellim atij të gjithë energjinë tonë dhe besojmë se kjo gjë do e ndihmojë për të fituar edhe kësaj here”, lexohet në komunikatë.
Michael Schumacher ndodhet në gjendje kome që nga 29 dhjetori i vitit 2013, pas një aksidenti me ski në alpet franceze. Një aksident që solli pasoja shumë të rënda dhe të pakuptueshme për personat pranë 7 herë kampionit të Formulës 1.
“Dëmtimi ishte i rëndë dhe është e vështirë të pranohet pasi rrethanat e rrëzimit ishin shumë normale. Jemi të habitur pasi ka pasur rrëzime të tjera shumë më të rrezikshme dhe Michael gjithmonë ka shpëtuar”, lexohet më tej në komunikatë.
Top Channel
