Spanja nënshtroi Italinë me futbollin e saj kombinativ, por arriti të shënonte vetëm një gol në pjesën e dytë, atëherë kur hyri në lojë David Silva.
Pedro ishte autori i golit përcaktues të ndeshjes, ndërsa Diego Costa, lojtari i shumëpritur i këtij takimi, nuk doli kurrë në lojën e tij duke qenë thjesht një hije në fushë.
Italia rrezikoi vetëm në fillim të takimit, kur Alessio Cerci goditi shtyllën pas një aksioni të bukur individual.
Franca i jep leksione Hollandës
Pas 17 ndeshjesh radhazi pa humbje (11 fitore dhe 6 barazime), Hollanda u mund nga Franca 2-0. E udhëhequr nga Karim Benzema, djemtë e Deschamps krijuan raste të mira për shënim dhe i shfrytëzuan ato.
Sulmuesi i Realit realizoi një gol të mrekullueshëm me një goditje fluturimthi në minutën e 32, ndërsa 8 minuta më vonë Matuidi shënoi një tjetër gol fantastik duke dërguar në rrjetë krosimin e Valbuenës pas një akrobacie spektakolare.
Kili meritonte më shumë ndaj Gjermanisë
Gjermania fitoi ndaj Kilit 1-0 në një ndeshje ku amerikano-latinët meritonin më shumë. Goli i Gotzes në minutën e 16 nuk tregon me saktësi atë që u pa në fushë.
Kili luajti me intensitet dhe kombëtarja e drejtuar nga Joachim Low dukej e “mbytur” duke mos arritur për asnjë moment të tregonte nivelin e saj më të mirë.
E meta e vetme e Kilit ishte mungesa e qartësisë para portës kundërshtare.
Cristiano, dygolësh ndaj Kamerunit
Cristiano Ronaldo është shndërruar në golashënuesin më të mirë të Portugalisë me 49 gola pasi në miqësoren e së mërkurës ndaj Kamerunit shënoi një dygolësh.
Sulmuesi i Realit shënoi golin e parë dhe të pestë të kombëtares luzitane në ndeshjen e fituar 5-1 ndaj një kundërshtari të dobët.
Neymar, 3 gola ndaj Afrikës së Jugut
Në një stadium të boshatisur, Brazili mposhti 5-0 Afrikën e Jugut.
Ndeshja dukej më shumë si një seancë stërvitore për djemtë e Luiz Felipe Scolari, i cili po bën provat e fundit para se të shpallë listën me 23 lojtarë për Botërorin.
Ylli i takimit ishte Neymar me 3 golat e tij.
Top Channel
