Gjenevë, pa marrëveshje për Homsin

Bisedimet, në fakt, kanë mbetur në vendnumëro, duke zbehur entuziasmin e së dielës mbi një pakt të mundshëm evakuimi të grave dhe fëmijëve nga qyteti i rrethuar, e duke mos përcjellë asgjë të re për kë shpreson në një zgjidhje paqësore të konfliktit të përgjakshëm.

I dërguari i OKB-së, Lakhdar Brahimi, e pranoi se pavarësisht pritshmërive, as kjo ditë nuk prodhoi ndonjë zhvillim madhor.

“Druhem se nuk ka shumë për të raportuar. Sa i takon largimit të grave e fëmijëve nga Homsi, mendoj se vullneti i qeverisë për ta bërë realitet një gjë të tillë nuk mungon, por ekzistojnë disa probleme, siç është çështja e snajperave”, tha Lakhdar Brahimi, ndërmjetës i OKB-së.

Nga ana e regjimit pati kërkesë edhe për një listë emrash të meshkujve, që duan të largohen nga Homsi, ide kjo që, me të gjitha gjasat, nuk do të mirëpritet nga grupet e opozitës.

I konsideruar kryeqyteti i rebelimit, Homsi është një prej qyteteve më të goditura gjatë konfliktit pothuajse trevjeçar. Bilanci i saktë i vdekjeve është i panjohur dhe shkalla e vuajtjeve njerëzore, e vështirë për t’u imagjinuar.

Ndërsa në Gjenevë tentohej arritja e një marrëveshje, nga qyteti fantazëm i shkatërrimit mbërrijnë raportet e katër vdekjeve nga uria; një nga viktimat fëmijë i mitur.

Bisedimet e paqes rinisën në Gjenevë mëngjesin e së hënës, por, si media shtetërore siriane, ashtu edhe delegatë të opozitës më vonë, raportuan se deklarata e parimeve, e prezantuar nga përfaqësues të ekzekutivit, ishte refuzuar nga kundërshtarët.

Dokumenti kërkonte nga sirianët zgjedhjen e një sistemi politik “pa formula të imponuara” nga jashtë, një referim i qartë ky ndaj përpjekjeve për largimin e Bashar al-Assad-it, ndërsa këmbëngulte nga ana tjetër të diskutohet për “terrorizmin”, më shumë se sa për transferimin e pushtetit.

Për kryenegociatorin e opozitës siriane, Hadi al-Bahra, deklarata ishte krejtësisht jashtë kornizave të Gjenevës dhe nuk e prekte aspak çështjen kryesore, për të cilën të dyja palët janë thirrur në tryezën e negociatave.

Brahimi është përpjekur në disa raste ta bëjë të qartë se këto bisedime do të shënojnë vetëm fillimin e një procesi të ngadaltë e të vështirë, por shtoi se kjo në vetvete nuk është diçka negative, nëse i shërben përpjekjeve për arritjen e një progresi të mirëfilltë dhe të qëndrueshëm.

Top Channel