Sylejman Selimi dhe Sami Lushtaku kanë angazhuar avokatë me përvojë në Gjykatën e Hagës për mbrojtjen e tyre.
Lajmin e bën të ditur “Koha Ditore”, sipas të cilës Selimi pritet të përfaqësohet në gjykim nga avokati amerikan, Gregory Guy Smith, i cili ka mbrojtur Idriz Balajn në Gjykatën për Krime Lufte në ish-Jugosllavi.
Ndërsa Lushtaku do të mbrohet nga Nick Kaufman, nga Izraeli, i cili ka mbrojtur disa prej kriminelëve më të mëdhenj në botë, siç është Kaing Guek Eav, komandant i burgut të khmerëve të kuq në Kamboxhia.
“KD” saktëson se ata kanë aplikuar për liçencim në Dhomën e Avokatëve të Kosovës dhe se strukturat e këtij institucioni janë duke shqyrtuar aplikimet e tyre.
Ish-komandanti i UÇK-së, Sylejman Selimi dhe ish-komandanti i zonës së Drenicës, Sami Lushtaku akuzohen për krime lufte, që supozohet se i kanë kryer në fshatin Likovc në vitin 1998.
Ata po ndiqen penalisht nga prokurorë ndërkombëtarë të EULEX-it. Akuzat kundër tyre janë të rënda dhe variojnë nga tortura e rrahja sistematike deri në trajtimin çnjerëzor të të burgosurve. Lushtaku akuzohet edhe për vrasjen e një civili shqiptar.
Top Channel