Irak, masakër mes sekteve fetare

Në të gjithë provincën në fjalë ka pasur shtim të aktivitetit të rebelëve sunitë, këto kohët e fundit. Luftëtarët ndjekës të kësaj dege të Islamit, siç pohojnë burime të policisë, kanë mësyrë të paktën 10 komisariate e kanë liruar një numër të madh të burgosurish.

Trazira raportohen edhe në Baladruz, 73 km në veri të Bagdadit, ku shpërthimi i një autobombe vrau të paktën 12 vetë. Arabët sunitë në Irak pretendojnë se janë shënjestruar e janë margjinalizuar politikisht nga qeveria me shumicë shiite e kryeministrit Nuri al Maliki.

Aktiviteti i militantëve është shtuar edhe në anën tjetër të kufirit, që Iraku ndan me Sirinë, e përgjithsisht në pothuajse të gjithë zonat me popullsi dominuese sunite, në të dy vendet.

Hendeku, mes dy degëzimeve të fesë Islame në Irak, po thellohet çdo ditë e më shumë. Akuzave sunite për diskriminim, ekzekutivi shiit i përgjigjet me shqetësimin që i shkakton prania e al Kaedës në zona sunite si Anbari, ku thotë se rrjeti terrorist është ulur këmbëkryq.

Kryeministri Maliki, megjithatë, ka mundur të sigurojë për momentin mbështetjen e liderëve më të rëndësishëm fisnorë sunitë në vend, në sytë e të cilëve qeveria është e keqja më e vogël.

Fiset e tyre bashkuan forcat me Shtetet e Bashkuara në 2006-n dhe 2007-n për të luftuar al Kaedën, por sunitët, në përgjithësi, ndihen të lënë mënjanë në klimën e re politike të krijuar në vend, pas tërheqjes së Amerikës në 2011-n.

Top Channel