Pakti SHBA-Afganistan në udhëkryq

Qeveria në Kabul po refuzon t’u lejojë forcave amerikane që të hyjnë në shtëpitë afgane në fund të operacioneve luftarake që mbarojnë vitin e ardhshëm.

Negociatorët po përpiqen të hartojnë një dokument të pranueshëm nga të dyja palët, për t’ua prezantuar liderëve afganë ditën e martë. Nëse nuk ka një marrëveshje, Uashingtoni mund t’i tërheqë të gjitha trupat vitin e ardhshëm.

Një zëdhënës i presidentit afgan Hamid Karzai tha për BBC se për momentin nuk ka fare fleksibilitet në qëndrimin e marrë nga qeveria e Kabulit ndaj forcave amerikane, në lidhje me mundësinë e hyrjes së tyre në shtëpitë dhe xhamitë afgane.

Ai tha se Karzai është shumë i vendosur në këtë drejtim dhe nuk do të pranojë asnjë marrëveshje që do t’u mundësojë forcave amerikane atë që ai e quan “qëllimi i agresionit”.

Presidenti Karzai dhe liderë të tjerë afganë prej kohësh kanë shprehur kundërshtimin e tyre ndaj sulmeve të tilla të trupave aleate në shtëpitë afgane. Por Shtetet e Bashkuara dëshirojnë të mund ta ushtrojnë këtë të drejtë me qëllim parandalimin e sulmeve terroriste që vijnë nga Afganistani.

Amerikania “New York Times”, që citon një oficer afgan, thotë se komandanti i trupave amerikane në Afganistan, gjenerali Joseph Dunford, u ofrua i gatshëm ta modifikonte këtë pjesë të marrëveshjes, duke propozuar lejimin e hyrjes nëpër shtëpi “në raste të jashtëzakonshme”. Por oferta është refuzuar nga zoti Karzai.

Top Channel