Filipine, shënohen viktimat e para të tajfunit

Të paktën 3 persona, përfshi një foshnjë 1-vjeçare, kanë mbëtur të vdekur. Foshnja dhe një person tjetër janë goditur nga mbeturinat e stuhisë në provincën Cotabato, ka bërë të ditur Këshilli Kombëtar për Reduktimin dhe Menaxhimin e Rreziqeve nga Fatkeqësitë.

Në Cebu, një grua mbeti e vdekur pasi u godit nga rënia e një peme kokosi, sipas qeverisë provinciale të Cebu-së.

Stuhia më e fuqishme e vitit ka goditur tashmë Filipinet, ku me mijëra kanë nisur të largohen që prej së
enjtes nga zonat e rrezikuara mes paralajmërimeve për katastrofë
natyrore.

Cikloni me erëra që mund të mbërrijnë maksimumi deri në 380 km/orë është vërtitur në perëndim të Paqësorit për t’u kthyer tani nga rajonet qëndrore të arkipelagut.

Fuqia e supertajfunit “Haiyan” është e barabartë me atë të një uragani të kategorisë së pestë, edhe pse kur të prekë tokën mëngjesin e së premtes, erërat e tij pritet ta reduktojnë shpejtësinë në 240 km/orë.

Stuhia, thotë CNN, është aq e madhe në diametër, sa retë e saj mbulojnë gati dy të tretat e të gjithë vendit.

Gati 4.000 vetë u evakuuan nga zonat e populluara në qendër të Filipineve, ndërsa pritet që superstuhia dhe shirat e saj të rrëmbyer të prekin me miliona vetë.

Për 30 provinca, agjencia e motit “Pagasa” ka lëshuar paralajmërime për vërshime ujrash e rrëshqitje toke.

Shumë shkolla janë mbyllur, ekipet e ndërhyrjes së shpejtë janë në gatishmëri dhe linjat ajrore kanë pezulluar fluturimet.

Më të rrezikuarit janë banorët e ishullit Bohol, i cili është shumë pranë rrugës së parashikuar të stuhisë. Muajin që shkoi, Boholi u godit nga një tërmet 7,1 ballësh, i cili mori më shumë se 220 jetë njerëzish e detyroi 350,000 të tjerë të shpërngulen.

Një tjetër ishull, në trajektoren e mundshme të ciklonit, është resorti i Boracay-t, e kjo ka detyruar shume turistë të lënë përgjysmë pushimet dhe t’i largohen rrezikut të mundshëm.

Top Channel