Kosovë, 24 komuna në balotazh
04/11/2013 00:00
“Kasapi i Bosnjës” kërkon të lirohet me kusht, refuzohet kërkesa e kriminelit të luftës 21/05 21:45
Rezultatet preliminare të zgjedhjeve të tre nëntorit tregojnë se Kosova do të shkojë në balotazh në gjithsej 24 komuna. Partia Demokratike e Kosovës dhe Lidhja Demokratike do të ballafaqohen në tetë prej tyre.
Kështu PDK-ja shkon në raundin e dytë me LDK-në në Gjilan, Prizren, Dragash, Lipjan, Ferizaj, Viti, Klinë dhe Kamenicë.
Raund të dytë do të ketë edhe Vushtrria, Rahoveci dhe Suhareka në të cilat do të garojnë kandidatët e Partisë Demokratike dhe Aleancës për Ardhmërinë e Kosovës. Kandidati i AAK-së së Ramush Haradinaj do të përballet në raundin e dytë të zgjedhjeve me kandidaten e AKR-së Mimoza Kusari Lila dhe në Gjakovë. Mitrovica e jugut con në balotazh PDK me AKR.
Komuna e Junikut, Obiliqit dhe Pejës do të ballafaqojë kandidatët e LDK-së dhe Aleancës për Ardhmërinë e Kosovës. Iniciativa Qytetare për Malishevën e ndarë nga PDK-ja pak para zgjedhjeve, po kështu është në balotazh me LDK- në.
Edhe në kryeqytetin kosovar do të votohet në raundin e dytë. Kandidati Isa Mustafa nuk e kaloi 50 përqindëshin e votave në Prishtinë duke shkaktuar kështu një përballje të dytë me kandidatin e Lëvizjes Vetëvendosje Shpend Ahmeti.
Interesante është fakti se në këto zgjedhje, PDK-ja fitoi në raundin e parë vetëm në katër komuna, LDK-ja në tri dhe Aleanca për Ardhmërinë e Kosovës në vetëm një komunë. Vetëvendosje përvec që s’e fitoi asnjë komunë edhe balotazhin do ta ketë vetëm në Prishtinë.
Komunat në të cilat do të qeverisë PDK-ja në mandatin e ardhshëm janë Kaçaniku, Skënderaj, Shtimja, dhe Drenasi. Istogun, Fushë Kosovën dhe Podujevën e fitoi në raundin e parë LDK-ja.
Kandidati i pavarur Rufki Suma ndërkaq fitoi sërish në raundin e parë Komunën e Hanit të Elezit. Edhe partia turke ka fituar në komunën e Mamushës. Sa i përket komunave me shumicë serbe, shihet qartë se Lista Serbe e krijuar këtë vit me mbështetjen e shtetit serb ka gjetur përkrahjen e komunitetit serb.
Kështu kjo listë shkon në balotazh në Novobërdë me kandidatin e LDK-së Bajrush Ymeri, në Partesh Kllokot dhe Graçanicë me Partinë e Pavarur Liberale Serbe e cila drejtohet nga zëvendëskryeministri Slobodan Petrovicit. Ky i fundit ka rastin të ballafaqohet në raundin e dytë me partnerin e tij të nivelit qendror, partinë e kryeministrit Thaci në komunën e Shtërpcës.
Rezultatet ende nuk dihen për katër komunat me shumicë serbe në veri të Kosovës. Raundi i dytë i zgjedhjeve lokale në Kosovë do të zhvillohet me 1 dhjetor.
Top Channel
