Ikën energjia, Venezuela në terr

Metroja nëntokësore e Karakasit ndaloi funksionimin dhe njerëzit u evakuuan nga dyqanet dhe zyrat. Presidenti Nicolas Maduro, përmes një mesazhi të postuar në profilin e tij në rrjetin social Twitter, deklaroi se bëhet fjalë për një sabotazh.

Ndërprerjet e energjisë janë të zakonshme në Venezuelë, sidomos në disa qytete, por jo në Karakas. Edhe pse vendi ka rezerva të mëdha nafte, rreth 70 për qind e furnizimit të tij me energji varet nga hidro-elektriciteti.

Terri u verifikua rreth orës 20:00 të së hënës, me orën lokale, teksa presidenti Maduro po mbante një fjalim televiziv. Në mungesë të valëve televizive, zoti Maduro kaloi në Twitter duke thënë se, “qeveria po e monitoron incidentin e çuditshëm”, duke e konsideruar atë një “akt sabotazhi”. “U kërkoj qytetarëve që të kenë kujdes”, tha ai.

Ndërprerja e energjisë nuk preku rafineritë e naftës të Venezuelës, të cilat furnizohen nga impiante të veçanta gjeneratorësh. Pak kohë pas ndërprerjes, ministri i Energjisë, Jesse Chacon deklaroi se elektriciteti ishte kthyer në pjesën më të madhe të Karakasit, por mungonte ende në disa rajone të vendit.

Ai tha gjithashtu se origjina e ndërprerjes ishte në qendër të Venezuelës. “Ishte një defekt direkt tek sistemet e nënstacionit. Është shumë herët për të spekuluar, por po mbikëqyrim problemin”, tha Chacon.

Top Channel