Presidentja e Kosovës, Atifete Jahjaga u prit të hënën në Londër nga sekretari i Jashtëm i Britanisë së Madhe, William Hague.
Jahjaga po qëndron në Londër për të marrë pjesë në takimin e 9 të Forumit Botëror Ekonomik Islamik, ku do të diskutohet për çështjet e bashkëpunimit në fushën e ekonomisë dhe teknologjisë, si dhe për avancimin e rolit të gruas në shoqëri.
Sipas raportimeve të “RTK”, presidentja Jahjaga dhe sekretari Hague biseduan për zhvillimet më të fundit në Kosovë, për procesin e normalizimit të marrëdhënieve ndërmjet Kosovës dhe Serbisë, për rrugën evropiane të Kosovës, si dhe për çështjen e parandalimit të dhunës seksuale në periudha konflikti.
Jahjaga e falënderoi sekretarin Hague për mbështetjen që Britania i ka dhënë Kosovës në marrjen e MSA-së, negociatat për të cilën kanë filluar dhe theksoi përkushtimin e institucioneve të vendit dhe të gjithë shoqërisë në Kosovë për të përfunduar me sukses këto negociata deri në pranverë të vitit të ardhshëm.
Zonja Jahjaga theksoi se, Kosovës i duhen reforma të thella për qëndrueshmërinë e shtetit dhe të shoqërisë dhe tha se rruga evropiane e saj nuk duhet të shkurtohet pa përmbushur të gjitha detyrimet.
Duke folur për zgjedhjet lokale në Kosovë, që mbahen më 3 nëntor, presidentja vlerësoi se ato janë një test i demokracisë dhe i pjekurisë politike të Kosovës, prandaj dhe është shtuar angazhimi i të gjithëve për mbajtjen e zgjedhjeve të drejta, të rregullta, gjithëpërfshirëse dhe të ndershme.
Nga ana e tij, sekretari Hague e vlerësoi si një arritje të rëndësishme marrëveshjen për normalizimin e marrëdhënieve ndërmjet Kosovës dhe Serbisë. Ai tha se normalizimi duhet të bëhet përmes bisedimeve dhe se rruga evropiane e dy vendeve është e lidhur ngushtë me zbatimin e plotë të marrëveshjes së arritur në Bruksel.
Zoti Hague i cilësoi si të rëndësishme zgjedhjet lokale në Kosovë dhe shfaqi shpresën për një pjesëmarrje të qytetarëve, në veçanti të komunitetit serb, për të zgjedhur përfaqësuesit legjitimë përmes votës.
Top Channel
