Një gjykatë kineze ka refuzuar kërkesën për apelim nga politikani Bo Xilai, në lidhje me vendimin që e shpall fajtor atë dhe e dënon me burg të përjetshëm, i cili iu dha muajin e kaluar.
Agjencia e lajmeve Xinhua bën të ditur se Gjykata e Lartë Popullore e provincës Shandong refuzoi apelimin e Bo, në një vendim të dhënë në orët e para të së premtes.
Bo u shpall fajtor për ryshfet, përvetësim dhe abuzim me pushtetin, nga një gjykatë më e ulët në të njëjtën provincë, muajin e kaluar, si dhe u dënua me burgim të përjetshëm.
Ish-lider i Partisë Komuniste në Chongqing, Bo, u shkarkua nga posti që mbante në 2012-n, pas një skandali që rezultoi në dënimin e gruas së tij për vdekjen e një biznesmeni britanik.
Gjykata e lartë në Shandong, provinca ku u zhvillua gjyqi ndaj Bo, pranoi më herët apelimin e tij në fillim të këtij muaji. Forca të shumta sigurie u raportuan në afërsi të gjykatës, teksa pamjet treguan ngritje barrikadash përreth saj.
Bo Xilai, ish-shefi karizmatik i Partisë Komuniste në qytetin e Chongqing, në Kinën jug-perëndimore, ishte anëtar i Byrosë Politike në pushtet, një nga 25 zyrtarët më të lartë të partisë në vend.
Ai shihej si një kandidat i mundshëm për të arritur maja edhe më të larta, deri kur u godit nga ngjarjet e fundit, që e rrëzuan nga lavdia e madhe. Ky përbën rastin më të madh të goditjes politike, që ka prekur elitën qeverisëse të Kinës në dekadat e fundit.
Bo u shpall fajtor për marrje ryshfeti prej rreth 20 milionë yuan (3,3 milionë dollarë), personalisht ose përmes familjarëve të tij. Ai u akuzua gjithashtu për abuzim me postin e tyre, pasi u përpoq të shfrytëzonte pozicionin e tij për të mbuluar krimet e së shoqes.
Sipas korrespondentëve, ishte pothuajse e qartë se dënimi i Bo nuk do të kthehej mbrapsht, pasi gjykatat kontrollohen nga Partia Komuniste në pushtet, nga e cila Bo u përjashtua vitin e kaluar. Megjithatë, mbështetësit e Bo besojnë ende se ai është viktimë e një spastrimi politik.
Top Channel
