Sport

F1, Domenicali: Të luftojmë për vendin e dytë

25/10/2013 20:25

Me një konkurrencë shumë të fortë në Botërorin e Formulës 1, drejtori i përgjithshëm i Ferrarit, Stefano Domenicali, i kërkoi dy pilotëve të tij që të japin maksimumin për të mbajtur vendin e dytë në renditjen e konstruktorëve.

“E dimë që ka skuadra shumë të forta. Aktualisht jemi të dytët, por nëse duam të ruajmë këtë pozicion në renditje duhet të përkushtohemi shumë dhe të arrijmë rezultate të mira në garat e mbetura”, deklaroi Domenicali, në një konferencë për shtyp nga pista e Buddh, ku këtë të dielë do të zhvillohet Çmimi i Madh i Indisë.

“Për ne, ky fund sezoni është intensiv, pasi janë tre skuadrat në duel për vendin e dytë. Në garat e fundit kemi parë përmirësime konstante tek skuadrat e Mercedesit dhe Lotusit, prandaj nuk do të jetë aspak e thjeshtë”.

Ndërsa mbeten edhe katër gara deri në fund të sezonit, Ferrari ka grumbulluar 297 pikë, shumë larg Red Bullit (455 pikë), që mund të fitojë që në fundjavë titullin për pilotë dhe konstruktorë.

Klasifikimi sheh vetëm dhjetë pikë pas “kokëkuqes” ekipin e Mercedesit dhe të shkëputur me një diferencë prej 33 pikësh skuadrën e dyshes Raikkonen-Grosjean, Lotus-Renault.

Top Channel