Itali, rikuperohen dhjetëra trupa në det
07/10/2013 15:50
Si arriti të fitonte ‘influencuesi i Tiktok’? Rumania hetime për ndërhyrje nga jashtë në zgjedhje 28/11 07:38
Zhytësit italianë rikuperuan trupa të tjerë të emigrantëve të mbytur javën e shkuar në afërësi të ishullit të Lampeduzës, në një prej aksidenteve më të rëndë detarë të dekadës së fundit.
83 trupa u rikuperuan ditën e dielë brenda anijes së fundosur, ndërsa operacionet po vazhdojnë me intensitet edhe gjatë së hënës.
Me trupat e rikuperuar, numri zyrtar i të vdekurve shkon në 194. 200 persona janë ende të zhdukur, ndërsa 155 i mbijetuan aksidentit.
Ndërkohë, autoritetet kanë kundërshtuar akuzat për reagimin e ngadaltë në ardhjen në ndihmë për klandestinët.
Sipas Rojes Bregdetare Italiane, ajo ndërhyri sapo mësoi për atë që po ndodhte në det në jug të Lampeduzës, ndërsa reagimi më i shpejtë bëhej i pamundur për faktin se mjeti i klandestinëve nuk kishte asnjë radio apo celular funksional, ndaj edhe asnjë thirrje për ndihmë nuk mbërriti në Itali.
Me mijëra emigrantë të jashtëligjshëm tentojnë të kalojnë nga vendet e Afrikës së Veriut drejt Italisë çdo vit dhe aksidentet janë të zakonshme, por përmasat e këtij aksidenti kanë tronditur të gjithë Europën.
Ndërkohë, Franca ka kërkuar një mbledhje urgjente të BE-së, për t’i ardhur në ndihmë Italisë që të përballet me këtë fluks emigrantësh.
Top Channel
