Siria akuzon “terroristët” e huaj

Por ai propozoi se bisedimet ne Gjenevë nuk mund të kenë sukses kur turqit, sauditët dhe katarasit ndihmojnë rebelët.

“Konferenca e paqes në Gjenevë nuk mund të ketë sukses nëse vende si Turqia, Arabia Saudite dhe Katari nuk ndalin furnizimin me armë dhe financimin e rebelëve”, deklaroi Muallem për gazetarin e BBC, Jeremy Bowen.

Ai gjithashtu konfirmoi për OKB-në se Siria ka ndërmend të bashkëpunojë me Organizatën për Ndalimin e Armëve Kimike, në kuadër të programit për asgjesimin e armëve të tilla.

Në një fjalim të mbajtur më herët gjatë muajit në Asamblenë e Përgjithshme të OKB-së, Muallem krahasoi “pushtimin e Sirisë nga terroristët” me sulmet e 11 shtatorit në Nju Jork.

Ai akuzoi vende “të mirënjohura” se mbështesin “terroristët” që luftojnë kundër trupave qeveritare dhe se ushtrojnë agresion ushtarak jashtë mandatit të Këshillit të Sigurimit të OKB-së.

Gjithashtu, shefi i dipomacisë siriane hodhi poshtë idenë se në vendin e tij ka rebelë të moderuar. “Në Siri ka vrasës që copëtojnë trupat e njerëzve ndërsa janë ende gjallë dhe ua dërgojnë copat e tyre familjarëve të viktimave”, tha Muallem.

Ai theksoi se Siria vazhdimisht ka mbështetur një zgjidhje politike për konfliktin, por shtoi se shtete të huaja, që sipas tij u japin armë kimike rebelëve, duhet t’u binden gjithashtu angazhimeve të tyre.

Ndërkohë, edhe presidenti sirian Bashar al Assad konfirmoi se do të zbatojë planin për asgjesimin e armëve kimike në vendin e tij, në një intervistë për televizionin italian Rai News 24.

“Sigurisht që ne do ta implementojmë planin. Kjo është historia jonë. Ne duhet të zbatojmë çdo traktat që nënshkruajmë”, deklaroi Assad.

Ndërkohë, OKB ka deklaruar se konflikti në Siri përbën një kërcënim për stabilitetin ndërkombëtar. Ndërsa vendet fqinje të Sirisë deklarojnë se fluksi i madh i refugjatëve po dobëson burimet e tyre të jetesës.

Top Channel