Rama, takime me zyrtarë në New York

Zyra e shtypit e Kryeministrisë njofton se gjatë takimit me Presidentin turk Gyl, Kryeministri nënvizoi edhe njëherë rëndësinë e partneritetin strategjik mes dy vendeve tona. Presidenti Gyl dhe Kryeministri Rama biseduan edhe për nxitjen e mëtejshme të marrëdhënieve tregtare mes Shqipërisë dhe Turqisë.

Një vëmendje të posaçme në këtë takim pati gjithashtu edhe ndihma që qeveria turke mund të japë për përmirësimin e sistemit shëndetësor në vendin tonë.

Ndërsa në takimet e zhvilluara me Presidenti Josipoviç të Kroacisë dhe atë bullgar Plevneliev, kryeministrit Rama i është shprehur gadishmëria e këtyre dy vendeve, për të mbështetur Shqipërinë në në marrjen e statusit të vendit kandidat në BE në dhjetor.

Takimi i Kryeministrit Rama me homologun e tij malazez Gjukanoviç u përqendrua në bashkëpunimin rajonal, në mënyrë të veçantë në dy fusha: Studimin e mundësisë për degëzimin e rrjetit të TAP drejt Kosovës dhe Malit të Zi, si edhe krijimit të një projekti të përbashkët për ndërtimin e një autostrade që do të kalonte nga Kroacia drejt Malit të Zi e Shqipërisë, për të lidhur bregdetin Adriatik me atë Jon.

Në një tjetër takim atë me Drejtoreshën e  Përgjithshme të PNUD, Helen Clark, Kryeministri Rama kërkoi mbështetjen e vazhdueshme të PNUD-it për vendin tonë, sidomos në ngritjen e kapaciteteve të administratës dhe burimeve njerëzore, për të qenë plotësisht të përgatitur në raport me sfidat dhe detyrimet e reja që Shqipëria pritet të ketë shumë shpejt ndaj Bashkimit Evropian.

Top Channel