KQZ-OSBE firmosin bashkëpunimin

“Organizata për Siguri dhe Bashkëpunim në Europë, misioni në Kosovë, do të kryejë një rol lehtësues në katër komunat veriore në procesin e çertifikimit dhe regjistrimit të subjekteve politike nëpërmjet sjelljes së aplikacioneve për çertifikim të subjekteve politike në Komisionin Qendror të Zgjedhjeve. Regjistrimi dhe çertifikimi i subjekteve politike do të kryhet duke ndjekur proçedurat e përcaktuara në ligjin e Kosovës”, thuhet në letrën që shefi i OSBE-së i ka dërguar kryetares së KQZ-së dhe që si e tillë mori aprovimin e shumicës së anëtarëve të Komisionit.

Njëra nga pikat që nxiti debat ishte ajo për transferimin e të dhënave të serbëve me qëllim që të krijohet lista e votuesve e saktë për katër komunat veriore në Kosovë. KQZ-ja kërkoi nga OSBE-ja heqjen e kësaj pike pasi bëhet fjalë për një çështje me të cilën duhet të merret Ministria e Brendshme.

Edhe mungesën e KQZ-së në veri do ta plotësojë OSBE-ja. Në memorandum thuhet se, në katër komunat veriore do të vendosen zyrat e OSBE-së në dispozicion të Komisioneve Komunale Zgjedhore.

“Misioni i OSBE-së, në koordinim me Komisionin Qendror të Zgjedhjeve do të kryejë gjithashtu trajnimin e Komisioneve Komunale Zgjedhore në proçedurat e menaxhimit të zgjedhjeve. OSBE do të kujdeset po kështu që të realizojë një fushatë informuese për votuesit serbë në veri. Fushata do të jetë ekskluzivisht e fokusuar në sqarimin e votimit dhe proçedurave të tjera të lidhura me zgjedhjet”, thuhet në memorandumin e bashkëpunimit.

Marrëveshja në tërësi u kundërshtua nga anëtari i lëvizjes Vetëvendosje në KQZ, që deklaroi se shumica prej pikave tashmë janë zbatuar.

Top Channel