Egjipt, luftë në afërsi të Kajros

Sipas televizionit shtetëror, gati 30 të dyshuar si militantë kanë përfunduar në pranga. Por, vetëm pak orë nga nisja e ofensivës, forcat qeveritare kanë ndeshur rezistencë dhe janë detyruar të mbrohen nga breshëritë e armëve.

Të paktën 11 agjentë u vranë në një komisariat policie të Kerdasës muajin e kaluar. Trupat ushtarake u dërguan atje në orët e para të mëngjesit, të mbështetur edhe nga helikopterë. Në përplasjet me militantët mësohet të ketë humbur jetën një zyrtar i lartë i policisë.

Persona të armatosur e të paidentifikuar, sipas BBC, kanë zënë pozicion në disa ndërtesa të qytetit, që njihet si fortesë e mbështetësve të Vllazërisë Myslimane të presidentit të përmbysur Mohamed Morsi.

Gjenerali Nabel Farrag mbeti i vrarë kur personat e armatosur hapën zjarr nga tarracat e shkollave dhe xhamive që kishin marrë nën kontroll, njoftoi Ministria e Brendshme.

Pas mesditës, të shtënat janë reduktuar, por në rrugët e qytetit ka ende një prani të theksuar policie dhe postoblloqe ushtarake. Të paktën 1 mijë persona, përfshirë rreth 100 oficerë policie, kanë humbur jetën në protestat që pasuan rrëzimin e presidentit Morsi nga pushteti.

Ngjarjet më të rënda u verifikuan kur forcat e sigurisë ndërhynë për të shpërndarë protestuesit pro-Morsit muajin e kaluar në disa kampe të ngritura në qytetin e Kajros. 

Top Channel