Norvegji, fiton qendra e djathtë e Solberg

Solberg e përshkroi fitoren e saj si “një fitore historike në zgjedhje për partitë e qendrës së djathtë”. Partia e saj konservatore pritet të formojë një qeveri të re, në koalicion me partinë për proges, e cila kundërshton emigracionin.

Këto ishin zgjedhjet e para në Norvegji, që kur Anders Breivik vrau 77 persona në një atentat me bombë dhe vrasjeve me armë zjarri në vitin 2011. Ndërkohë që janë numëruar 3/4-at e votave, blloku i 4 partive të qendrës së djathtë ka fituar 96 nga 169 vende që ka parlamenti norvegjez.

Stoltenberg tha se do të tërhiqej, pasi të prezantojë buxhetin, muajin e ardhshëm. “Bazuar në traditën parlamentare norvegjeze, do të jap dorëheqjen time dhe të qeverisë time pasi të kem prezantuar buxhetin kombëtar më 14 tetor, kur të ketë edhe qartësi mbi bazat parlamentare për formimin e qeverisë së re”, tha ai.

Lideri i laburistëve, kryeministër që prej vitit 2005, uroi zonjën Solberg për fitoren. Ai tha se partia e tij u përpoq “të bënte atë që s’e ka bërë askush, për të fituar mandatin e tretë radhazi, por rezultoi diçka tepër e vështirë”.

Solberg, 52 vjeç, do të bëhet kryeministrja e dytë femër në historinë e Norvegjisë dhe e para kryeministre konservatore që prej 1990-s.

Ajo u tha mbështetësve në Oslo: “Sot votuesit u dhanë një fitore historike në zgjedhje partive të qendrës së djathtë. Ne do t’i japim vendit një qeveri të re”.

Korrepondentët thonë se të paktën 2 postet më të larta të kabinetit, ndoshta edhe 3, pritet të zihen nga gra.

Këto ishin zgjedhjet e para të përgjithshme në Norvegji, që prej sulmeve nga Breivik, një ekstremist i djathtë, i cili vrau 77 persona në kampin e të rinjve të partisë Laburiste, në 2011.

Breivik ka qenë më parë anëtar i partisë së Progresit.

Top Channel