Përplasja mes trupave ushtarake filipinase dhe rebelëve myslimanë në
Filipine ka hyrë në ditën e dytë, me civilë të shumtë që mbahen peng nga
guerrilasit.
Të paktën gjashtë persona mbetën të vrarë në dhunën e së hënës në qytetin Zamboanga, në Mindanao, në jug të vendit. Përleshjet filluan kur një fraksion i lëvizjes Fronti për Çlirimin Kombëtar hyri në qytet në orët e para të së hënës.
Të shtëna armësh zjarri janë dëgjuar në Zamboanga edhe mëngjesin e së martës, me banorët që kanë braktisur zonat e përfshira nga trazirat.
Anëtarët e lëvizjes rebele donin të ngrinin flamurin e tyre në bashkinë e qytetit, sqaruan burime ushtarake. Për momentin nuk dihet me saktësi se sa persona kanë mbetur të bllokuar nga konflikti apo mbahen peng nga rebelët.
Një zëdhënës i këtyre të fundit deklaroi për gazetën “Philippine Daily Inquirer” se grupi mban 35 pengje. “Ne i rrëmbyem ata nëpër rrugë, në mënyrë që ushtria të mos na qëllonte kur të na shihte”, tha zëdhënësi.
Por kryetarja e bashkisë në Zamboanga, Isabelle Climaco Salazar deklaroi për transmetuesin ABC-CBN ditën e martë se rreth 170 civilë mbahen aktualisht peng.
Ndërkohë, policia lokale deklaron në një komunikatë se vlerësimi i mëparshëm se 300 pengje mbaheshin nga rebelët u referohej banorëve që ndodheshin në zonat e prekura nga luftimet.
Të paktën pesë civilë u liruan mëngjesin e së martës pas një serie të gjatë negociatash, deklaroi policia në komunikatë.
Top Channel
