Zgjedhjet vendore në Kosovë

Në mbledhjen e radhës së kabinetit qeveritar Thaçi shtoi rëndësinë që sipas tij kanë zgjedhjet e 3 nëntorit pas ato do të mbahen në gjithë territorin e Kosovës.

“Qëndrimi i Qeverisë së Kosovës sa i përket regjistrimit të partive politike, mbështetja e Qeverisë dhe i imi personalisht është mbështetje për Komisionin Qendror Zgjedhor të Republikës së Kosovës dhe ne mbështesim çdo vendim që është në përputhje me Kushtetutën e Kosovës dhe Ligjet e Kosovës”, tha Hashim Thaçi.
 
Kryeministri kosovar njoftoi kabinetin qeveritar për takimin e radhës me homologun e tij serb. Ai tha se qëllimi i këtij takimi është që të përmbyllet marrëveshja për telekomin dhe energjinë.

“Këtë të diel do të zhvillohet takimi i radhës në mes të dy kryeministrave të Kosovës dhe atij të Serbisë, në Bruksel të udhëhequr nga baronesha Ashton. Qëllimi i këtij takimi është që të përmbyllet marrëveshja për telekomunikacionin dhe energjinë, besoj që do të përmbyllet me sukses. Kosova i ka kryer të gjitha obligimet e veta që i ka pasur për t’i përmbyllur edhe ato teknike, funksionale edhe politike po ashtu edhe BE-ja. Qëndrimi i Kosovës dhe i BE-së është identik sa i përket këtyre çështjeve, ndërsa unë dua të besoj se edhe Serbia do të marrë vendim pozitiv për aprovimin e këtyre dy marrëveshjeve”, u shpreh Thaçi.

Qeveria e Kosovës në këtë mbledhje miratoi projektligjin për Agjencinë e Menaxhimit Emergjent, projektligji për Ndryshimin dhe Plotësimin e Ligjit për Parandalimin e Konfliktit të Interesit në Ushtrimin e Funksionit Publik si dhe projektligjin për Ndryshimin dhe Plotësimin e Ligjit për Deklarimin, Prejardhjen dhe Kontrollin e Pasurisë së Zyrtarëve të Lartë Publike dhe deklarimin, prejardhjen dhe kontrollin e dhuratave për të gjithë personat zyrtarë.

Top Channel