Kosovë, 102 parti për çertifikim

05/09/2013 00:00

Të paktën 102 subjekte politike, 18 prej të cilave serbe, aplikuan për
çertifikim në KQZ për të marrë pjesë në zgjedhjet e 3 nëntorit.

Sipas raportimeve të mediave kosovare, disa nga partitë aplikuan në orët e vona të së mërkurës, pranë limitit kohor të caktuar. Ndër to është edhe Lista e Përbashkët Serbe.

Zyra për regjistrimin e partive politike ka 15 ditë afat për kontrollin e dokumentacionit, ndërsa më 19 shtator do të hidhet shorti për renditjen e subjekteve në fletëvotim.

Në fillim të muajit, në kuadër të përgatitjeve për zgjedhjet e 3 nëntorit, Komisioni Qendror i Zgjedhjeve në Kosovë votoi për heqjen e stemës së Republikës së Kosovës nga fleta e votimit.

Propozimin e solli anëtari serb i KQZ-së, Goran Zdravkoviç, i cili po kështu propozoi edhe ndryshimin e përmbajtjes së dokumenteve të tjera, si libri i nënshkrimeve, listën e kandidatëve të subjekteve politike, formën e konfirmimit të kandidatëve, etj.

Votimi i këtyre dokumenteve nxiti reagimin e ashpër të dy anëtarëve të KQZ-së, Adnan Rrustemi nga Vetëvendosje dhe Fadil Maloku nga Aleanca Kosova e Re, të cilët u shprehën kundër propozimit duke thënë se ky është një vendim i kryeministrit të Serbisë, Ivica Daçiç.

Anëtarët e KQZ-së nga radhët e LDK-së kanë abstenuar, ndërsa nga PDK-ja i kanë përkrahur. Ajo që befasoi ishte kryetarja e KQZ-së Valdete Daka, e cila në të gjitha votimet ka abstenuar. Për këtë ajo u kritikua nga anëtari i PDK-së, i cili e quajti votën abstenim si të papërgjegjshme.

Top Channel