Bota

Klandestinët në Britani

04/09/2013 23:20

Një raport i fundit ka detyruar opozitën britanike të konkludojë se, qeveria praktikisht i ka dhënë fund luftës së saj kundër emigracionit ilegal, pasi rezulton se punonjësit e emigracionit janë urdhëruar të bëjnë më shumë kujdes për pakësimin e radhëve për kontrollin e pasaportave, nëpër aeroporte apo pikat e kalimit kufitar, se sa ne zbulimin dhe luftën kundër emigracionit ilegal, njofton BBC.

Mungesat e mëdha të stafit të emigracionit dhe një sistem i dështuar për të skanuar elementët kriminalë kanë bërë që kufijtë e Britanisë të jenë në një gjendje kaosi.

Kjo situatë ka bërë që kryetari i Komitetit parlamentar për Çështjet e Punëve të Brendshme, Keith Vaz, të deklarojë se shtetasit e huaj, me precedent penalë jashtë Britanisë, të hyjnë në Britani apo të hyjnë në rrugën e kriminalitetit dhe të largohen disa orë më vonë, pa arritur të kapen.

Edhe nëse policia i kërkon, ata nuk mund të ndalohen, pasi zyrtarët e kufirit nuk kontrollojnë njerëzit që largohen nga Britania.

8% e të huajve, që kapen nga policia metropolitane, kërkohen në vendet e tyre respektive, por arrijnë të futen në Britani të pa shqetësuar.

Sipas shtypit, kërkimet e mauneve që hyjnë në Britani, me të cilat futen shumica e emigrantëve ilegalë në vend, janë pezulluar 22 herë në një afat 3-ditor gjatë prillit të këtij viti, për të përballuar radhët e gjata në pikat e kalimit kufitar, apo për të lejuar stafin e emigracionit për pushimin e drekës, ose mes turneve.

Një numër i madh emigrantësh shqiptarë arrijnë të hyjnë në Britani kryesisht me maune, të nisura nga vendet fqinje si Franca apo Belgjika, apo të nisura edhe nga vende të tjera të BE-së, ku ata mund të udhëtojnë pa viza.

Shumë prej tyre janë nën moshë, ose femra, që kërkojnë azil si minorenë për gjakmarrje apo prostitucion. Ndërkohë, një pjesë jo e vogël hyjnë dhe qëndrojnë në të zezë dhe punojnë ilegalisht, pas krizës në disa vende të tjera të eurozonës, ku një pjesë kanë qëndruar apo jetuar më herët.

Top Channel