Egjipti rihap kufirin me Gazën

Shumë të tjerë duan të kthehen në shtëpitë e tyre në Gaza. Nuk është e qartë se sa gjatë do të mbahet hapur kufiri. Liderët e HAMAS-it në territorin palestinez kanë marrëdhënie të tensionuara me udhëheqjen egjiptiane, të mbështetur nga ushtria.

Zyrtarët egjiptianë e kanë akuzuar lëvizjen islamike se ndihmon militantët në Sinai dhe mbylljen e pikë-kalimit kufitar të Rafahut e justifikojnë me shqetësimet për sigurinë.

Qeveria e përkohshme e Egjiptit ka lehtësuar ndërkohë edhe ndalim-qarkullimin e orëve të natës, të vendosur pas trazirave të dhunshme të javëve të fundit në vend. Ai do të nisë dy orë më vonë, më 21:00 me orën lokale, ndërsa të premteve, kur organizohen zakonisht protestat, do të fillojë më 19:00.

Mbi 1,000 vetë humbën jetën në fillim të muajit, gjatë përplasjeve të ashpra të mbështetësve të presidentit të përmbysur Mohamed Mursi dhe forcave të sigurisë, që spastruan kampet e demonstruesve.

Ushtria, e cila e rrëzoi Mursin më 3 korrik, ka vendosur në Egjipt gjendjen e jashtëzakonshme, ndërsa Vllazërinë Muslimane, që kërkon rivendosjen e tij në krye të shtetit, po e persekuton me shtypjen e dhunshme të tubimeve dhe arrestimin e anëtarëve të saj.

Top Channel