Muri kundër romëve, BE kritikon Sllovakinë
20/08/2013 16:25
Kryeministri gjeorgjian pezullon bisedimet e anëtarësimit në BE deri në fund të vitit 2028 28/11 22:56
Autoritetet e qytetit sllovak të Kosiçes informuan këtë të martë se kanë nisur një veprim ligjor për të prishur një mur që ndan familjet rome nga shumica e banorëve sllovakë të qytetit.
Ky zotim u realizua prej kryebashkiakut të Kosiçes, Richard Rasi, pas një letre të Komisioneres Europiane të Kulturës, Androulla Vassiliou.
Letër-ankesa e komisioneres u pranua nga ana e kryebashkiakut, i cili pranoi se muri shkelte ligjet europiane kundër racizmit dhe se për këtë arsye ishte i jashtëligjshëm.
Muret që izolojnë lagjet në të cilat jeton komuniteti rom kanë ngritur tensionet edhe më parë në Sllovaki.
Kosiçe, në lindje të vendit, është qyteti i dytë më i madh sllovak, pas kryeqytetit Bratisllava dhe këtë vit mban titullin e “Kryeqytetit Europian të Kulturës”.
Në regjistrimin zyrtar të popullsisë në vitin 2011, popullsia rome e Sllovakisë figuron në 106 mijë, nga 5,5 milionë që është numri i përgjithshëm i banorëve.
Megjithatë, numri i romëve në vend është objekt debatesh, me vlerësime të ndryshme që e ngrenë këtë shifër deri në 5% të popullsisë së përgjithshme, ose sa dyfishi i numrit të përgjithshëm të romëve të regjistruar.
Top Channel
