Siri, ekip hetimor nga OKB për armët kimike

Qeveria siriane ka pranuar “modalitetet themelore për bashkëpunim, për të siguruar sjelljen e duhur, të sigurt dhe efikase të këtij misioni”, tha një zëdhënës përmes një deklarate.

Siria është përfshirë në luftë për më shumë se 2 vjet, gjatë së cilës kanë vdekur mbi 100 mijë persona dhe miliona të tjerë janë shpërngulur apo janë kthyer në refugjatë nëpër vendet e tjera, sipas OKB-së.

Gjatë luftimeve ka pasur akuza të shumta mbi përdorimin e armëve kimike. Në qershor, Shtëpia e Bardhë njoftoi se forcat e presidentit sirian, Bashar al-Assad, kishin kaluar “vijën e kuqe” duke përdorur armët kimike, përfshi këtu edhe gazin sarin, kundër forcave rebele. Kjo bëri që qeveria e SHBA-ve të niste mbështetjen ushtarake ndaj luftëtarëve të opozitës, pavarësisht hezitimit fillestar të tyre për ta bërë diçka të tillë.

Qeveria e Sirisë, ndërkohë, ka akuzuar rebelët se kanë përdorur armë kimike gjithashtu. Këtu përfshihet edhe një incident i muajit mars, në Khan al-Asal, në provincën veriore të Aleppo-s, sipas medias shtetërore.

Zyrtarë të opozitës thanë se rebelët nuk kanë akses tek armët kimike apo raketat e nevojshme për t’i përdorur ato në një sulm, ndërsa disa liderë të tjerë të rebelëve thanë se ushtarët sirianë lëshuan “raketa kimike” ndaj civilëve dhe forcave opozitare.

Khan al-Asal do të jetë një nga 3 incidentet, që inspektorët e OKB-së do të kontrollojnë, siç bëri të ditur një nga zëdhënësit në fund të muajit korrik.

Kombet e Bashkuara thanë se udhëtimi i pashmangshëm mund të shërbejë si një pengesë për përdorimin e këtyre lloj armësh.

“Mbështetja e madhe e komunitetit ndërkombëtar për këtë hetim, e bën të qartë se përdorimi i armëve kimike nga cilado palë, nën cilëndo rrethanë, do të përbëjë një krim mizor”, bëri të ditur OKB.

Top Channel