Paqja në Lindjen e Mesme

Ai shpjegoi se takimi mes dy palëve do të zhvillohet ose në Izrael ose në Territoret Palestineze dy javet e ardhshme. Këtu, shpjegoi ai, do të nisë procesi i vërtetë i negociatave zyrtare.

Kryediplomati amerikan tha se të gjitha cështjet do të vendosen mbi tryezë. Më themeloret janë; Jeruzalemi. Palestinezët kërkojnë që pjesa lindore të jetë kryeqyteti i shtetit të ardhshëm. Izraeli kundërshton ndarjen e tij. Së dyti janë kufijtë; Izraeli kërkon të ruajë vendbanimet e mëdha hebraike, palestinezët kërkojnë kufijtë e 1967, por pranon ekzistencën e disa vendbanimeve të cilat do të mbahen në shkëmbim territori.

Së treti refugjatët palestinezë; izraelitët kundërshtojnë të drejtën e palestinezëve për t’u kthyer. Së katerti, siguria; palestinezët kërkojnë atribute tërësore për një shtet normal, Izraeli kërkon t’i zvogëlojë ato.

Deklarata e Sekretarit Amerikan të Shtetit, Xhon Kerri erdhi dy ditë pas bisedimeve mes palëve në Uashington.

Gjatë pesë muajve të fundit Kerri ka zhvilluar gjashtë vizita zyrtare në Lindjen e Mesme për përpjekjet për t’i kthyer palët përballë në të njëjtën tryezë.

Më herët, presidenti amerikan Barak Obama u takua me negociatoren izraelite, Ministren e Drejtësisë, Tzipi Livni dhe shefin palestinez të procesit, Saeb Erakat- në Shtëpinë e Bardhë.

Ish-ambasadori amerikan në Izrael, Martin Induk u caktua si i dërguari special për bisedimet izraelito-palestineze. Ai luajti një rol të rëndësishëm në bisedimet e pasuksesshme në Kemp Dejvid në vitin 2000 në presidencën e Bill Klintonit.

Në fundjavë qeveria izraelite miratoi lirimin e 104 të burgosurve palestinezë, gjë që do kryhet në katër faza gjatë këtyre muajve që do të lidhet edhe me progresin e procesit të paqes.

Qeveria izraelite miratoi edhe projekt/ligjin për zhvillimin e referendumit për cdo marrëveshje paqeje me palestinezët që përfshin lëshime të territoreve.

Top Channel